ونعم التغيييييييير !!!

النهارده يوم كئيييييب وأخباره كئييييييييبة جدااااا ,,, كلها أخبار تندرج تحت بند الظلم والقهر وانتصار البلطجة وكاننا قبل الثورة بأيام " نفس الأيام المفترجة السنة اللي فاتت " بالضبط!!!
كأن الثورة كانت مجرد حلم جماعي لا أكثر ...
حلم عشناه مع بعض وبدل مانكمل تنفيذه علشان نحققه .. نسيناه وافتكرنا إنه هيتحقق أوتوماتيكالي من تلقاء نفسه..!!!
كل الأوضاع زي ما هي مفيش جديد ...
بأمارة الحكم ببراءة ضباط القسم سئ السمعة من تهمة قتل الشهداء " المتظاهرين "..!!!
وبأمارة الهجوم المهين علي جمعيات حقوق الانسان " وكأنها بيوت للدعارة " ..!!!
وبأمارة التخوين والتهميش المتعمد لأي ثوري أو رأي مخالف للنفاق الاعلامي الرسمي..!!!
الحكم بالبراءة بتاع النهاردة راجع للقضاء ولسه في خطوات تانية للتقاضي مع احترامي للقضاء بس هيبقي " نفس مسلسل العبارة لو أخدوا حكم بعد كده "..!!!
ايه الجديد .. ايه الفرق .. ايه اللي اتغير ..
للأسف مفيش أي جديد حصل غير البهدلة وقلة القيمة لكل ما هو ثوري علي يد أتباع وأذناب النظام اللي لسه موجود بكامل هيئته وبقوة ..
كل اللي مبارك كان ممكن يعمله في الست شهور اللي كان عاوز يتنح ويقعدهم حصل وبكل اخلاص وتفاني وضمير من رجالة مبارك في المجلس العسكري ومعاونيهم ومنافقيهم في كل الهيئات ومؤسسات الدولة ..
ودي حاجة هما مش بينكروها أو يخجلوا منها لأنها الحقيقة ولانها عاجباهم ,,, لأنهم بيكدبوا أي حقيقة باستخدام اعلام أجير سفيه موجه وشوية مؤتمرات صحفية تضر أكثر مما تنفع..
هو ده التغيير اللي كنا عايزينه ..
احنا في منتهي السذاجة ..
احنا نستاهل وهييجي الدور علينا لما يرجعوا نظامهم لقوته ..
بس أنا عن نفسي مش هخاف,, يمكن حد يحس أن دي بلده هو كمان ويفكر يقف يقول لأ كفاااااااية حراااااااام ...
ياتري هنسكت لغاية ما كل ده يحصل ولا هنفوق ونلحق البلد قبل ما تضيع ؟؟؟
ممكن وجايز واحتمال وياريت نتحرك ..
ياااااااااااااارب ..MK

احنا فلسنا ولا ايه؟؟؟

النهارده كان في حدثين مختلفين,, في مكانين مختلفين,, في قضيتين مختلفتين,, بس التشابه بينهم رهيب والعامل المشترك موجود دائما وبقوة وبحضوره القوي في أي بلوة من البلاوي اللي بتنزل علي دماغنا وهو
(( الكذب والتضليل والانكار بكل بجاحة ))3*1!!!!...
الحكم الصادر بتجريم كشوفات العذرية الحقيرة التي تمت ومحاسبة المسؤول عنها وايقاف تنفيذ هذه الجريمة "رغم علمي بأنه حكم حبيس الأدراج لفترة من الزمن وللأسف مش هيجيب حق البنات الطاهرة اللي اتعرضوا للجريمة القذرة دي"... بس كله هييجي وقته.
ولو نظرنا للطرف الآخر نلاقي نفس الانكار من جانب اللواء عادل مرسي "محصلش ومعرفش وماشفتش ولو حصل يبقي بشكل فردي"!!!.
وعلي النقيض تماما ,,, من الكذب والتضليل ,,, ممكن نلاقي صدق وشجاعة
رئيس مباحث محترم ونزيه اعترف النهارده أمام النيابة ان 3 أطفال من المتهمين في أحداث مجلس الوزراء قام بالقبض عليهم بتاريخ سابق للواقعة وتحرير المحاضر لأسباب أخري تماما غير الاتهام اللي متوجه ليهم!!!..
والتلفيزيون وأصحاب الفيديو المعروض في المؤتمر بتاع اللواء عادل عمارة والمجلس نفسه أثبتوا افلاسهم واصرارهم علي اتباع سياسة المخلوع ونظامه!!!..
ليه؟؟؟؟؟.. مش عارف..
يمكن لو نجحت كنت ألاقي مبرر لأعادة نفس الخطة والأكاذيب والتضليل والخداع. بس بقوا بيتهرشوا بعدها بكام ساعة وربنا بيفضحهم في كل مرة وبيظهر الحق.. يبقي ليه؟؟؟؟
افلاس بعيد عنكم... هو كده ومايعرفوش غير كده علشان ماشافوش غير كده...
وياتري مفيش جديد نعمله علشان نجيب حق البلد. ونبدأ صح ونحاول نصلح أخطاء الشهور السابقة؟؟؟؟
ياتري احنا كمان فلسنا؟؟؟؟
وللا ايهههههههههههههه؟؟؟؟...MK

الطبع يغلب التطبع!!!

لا صوت يعلو فوق النباااااااح,,,!!!
بمناسبة إن الكل اليومين دول بيتكلم علي الاعلام والاعلاميين لاحظت ان أظرف حاجة في الفترة الصعبة الحالية هو سقوط كل الأقنعة عن كل الاعلاميين المنافقين اللي لم يستحملوا شهورا قليلة بدون نفاق ثورة كانوا أول من هاجمها وقطع فيها وفي ثوارها..!!!
بعد سنين من نفاق مبارك ونظامه وشهور قليلة من نفاق العسكر وأيام قليلة من نفاق الثورة وبكره هنشوفهم بينافقوا التيارات الدينية اتضح ليهم أن كده ماعادش نافع لأن الناس بقت بتفهم وتأخد أخبارها من اكتر من مصدر..
طيب يعملوا ايه؟؟؟؟
يعملوا ايه من غير نفاق وتضليل وكذب؟؟؟..
وهنا بقي احتاسوا...
النفاق والتضليل كل أدواتهم ومؤهلاتهم. يعملوا ايه لو مش هينافقوا؟؟؟
ولما وضح بشدة عداء المجلس العسكري للثورة والثوار جت الفرصة الذهبية
هنا جاء دور النباح,,,
وبدأوا يتبارون عن من أعلي نباحا وعلي من من الثوار والشرفاء سينبح اليوم وغيرهم باكر وبعدهما.. كلهم دلوقتي شغالين نباح علي أطهر وأشرف شباب في البلد "ثوارها وشهدائها" بس كل ده مش جايب نتيجة خلاص. دا حتي شوبير ومدحت شلبي كل يوم يتكلموا في السياسة لمدة تزيد عن الساعة وبيحاولوا يظهروا الثوار في هيئة البلطجية وأنهم سبب خراب البلد ( هو ده دورهم اليومين دول ) !!! بعد ماكانوا كل يوم يقعدوا ينافقوا في مبارك وعياله وبعدين نافقوا الثورة والثوار ودلوقتي جه دور المجلس بعد ما أكد كرهه للثوار.
أخيرا ,,,,,, أوجدوا لنفسهم دور ولازمة في الحياة..
مدام الجيش كاره الثورة يبقي دي الفرصة اللي لازم يستغلوها علشان يرجعوا يتألقوا كسابق عهدهم في نفاق الحاكم ونظامه..!!!
ياريت الشعب يفرز ويميز بين مناصري الثورة وشركائها اللي بجد وبين النصابين والحرامية والمنافقين اللي ركبوا الموجه ودلوقتي بينفذوا دورهم في تشويه الثوار بكل اخلاص لأسيادهم العسكر وكلها كام شهر وهيكونوا أول ناس تشتم في العسكر...
"الطبع يغلب التطبع".. ولكم الله يا شباب الثورة..
حسبي الله ونعم الوكيل.MK

كل عام وأنتم بخير...

كل عام وإخواني وأخواتي أبناء مصر الأقباط " من كل الطوائف المسيحية " بكل خير وصحة وسعادة بمناسبة عيد الميلاد المجيد ورأس السنة الميلادية.. وربنا يجمعنا في وطن واحد تحت علم واحد زي ما كنا طول عمرنا..آميييييين .MK

ماذا يحدث ولماذا؟؟؟؟؟؟

ما هو المسكوت عنه عن هذا المجلس؟ ولماذا يحدث ما يحدث؟ كل الحوادث والشواهد وكل هذا الكذب الذي يتصف بالبلطجة كذب عسكري يلقى وكأنه أمر ميداني لا يناقش .كذب يهين الكذب نفسه كوسيله تدعي الدهاء فنقول: الجيش تمت خصخصته كشركة أمنية تقوم على حراسة مصالح الإدارة الصهيوأمريكية مقابل معونة معلومة سنويا وأن يكون خير مصر طعمة لهم" كما حدث بين معاوية وعمر أبن العاص" وسدنتهم ومحاسيبهم. ونقول ايضا لقد أفرغت العقيدة القتالية من معناها لآن الجيش بعد حرب أكتوبر ونهايتها المفتوحة وبعد اتفاقية كامب دفيد لم تعد له نظرية للأمن القومي ونظرية الأمن القومي هى بالنسبه للجيش مثل الدستور بالنسبة للدولة وغياب نظرية للأمن القومي هو السبب فى تصفية الجيش من معظم قواده الشرفاء ولم يتبق غير "قوادينه" والعملاء وهو السبب فى تحوله الى قوة عمياء وهو السبب فى تربع هؤلاءالقادة الذين تروهم فى المجلس وفى الأعلام مزيج من البلاده والغفلة والعمالة والهطل أنهم ينفذون ما يملي عليهم وينتظرون حرب تلفزيونية من قوى الهيمنة على الحدود لكى يقولوا لاصوت يعلو فوق صوت المعركه وتكتمل أركان دولة ديكتاتورية جيش عمر سليمان من كلاب أمن الدولة وضباع البلطجية وذئاب الفلول من الداخل مقدمة لحرب تلفزيونيه من إخراج الناتو من الخارج لا يساعد اشتعال المنطقة فى تهيئتها وقد بدأت الحرب فى الداخل بتصفية الثوار بالقتل المباشر بدون محاسبة لقاتل شهيد واحد وتصفية عيون وانتهاك عرض مقدمة لكسر إرادة الشعب المصري وإعادة ترميم جدار الخوف الذى هدمه الشعب ولكن ما لم تتخيله كل خرائط الطريق المعدة أن ثورة الشعب المصري ثورة حقيقية كاملة الاركان لهذا لواجتمعت كل جيوش العالم ومجالسها على الوقوف أمامها لن تستطيع دفعها فهى ثورة شابة طويل مداها لاحدود لقدرتها فهي قدرة شعب إراد الحياة واستجابة القدر أن هذا الصراع فى ميدان التحرير بين الجيش وشعب كان أفراده عبيد ويطالبون بالحرية لن يظل موقع تسلية لحزب الكنبه كما كان يشاهد الرومان صراع الجلادياتر مع الوحوش البرية و.لن تتسلى بمشاهدته قوى الهيمنة الغربيه لن يدوم هذا الى مالانهاية أن الثوار لن يتركهم الشعب المصري لكى يصبحوا أصحاب الأخدود وسوف يكسر الشعب إرادة المجلس العسكري كما كسرها من قبل بهدم الجدار الذي بناه أمام سفارة أسياده
انتصر الشعب فلا تستعجلوه.MK

الامثال زي القطنة,,,مابتكدبش أبدا....!!!

زمان لما كنت بأسمع أمثال معينة كنت ساعات بحس انها مبالغ فيها شوية وساعات كتيييير ... مثلا: "يقتل القتيل ويمشي في جنازته" ياااااااه... هو في كده؟؟؟.
تهيألي انها صعبة شوية.... بس مش مستحيلة لاني شفتها علي كبر اليومين دول!!!.
وبالتحديد يوم ماقرات الخبر بتاع رفض " هند نافع بدوي المعيدة في كلية التربية جامعة بنها احدي الحرائر المصابات " فتاة مصرية بسيطة ومثقفة ومتعلمة" أول حاجة خطرت في بالي هو ايه اللي وداه يزورها ؟؟؟.
بعد ما تم سحلها والاعتداء عليها بالسب والضرب والايذاء بدنيا ونفسيا.... المفروض زيارة وبوكيه ورد وهول المفاجئة طبعا!!!!يخلوها يغمي عليها من الفرحة وتنسي اللي عملوا فيها كده.. واللي عملوه.. وانها متهمة في قضية تخريب!! واعتداء علي أفراد القوات المسلحة!!!.. وتنسي اسمها.. واسم عيلتها.. وتنسي هي كانت نازلة علشان ايه .. وتتشرف بالزيارة وتسكت بقي أو تطلع تقول كلمتين يريحوا ضمير الراجل اللي تاعبه ياعيني...!!!
بأي حق حد يحضر جنازة غير مدعو لها وهو السبب فيها...؟؟؟؟...!!!!. بعد الشر عليها طبعا " فعلا الامثال زي القطنة ,,مابتكدبش"..
بس لسوء حظهم وحسن حظ بلدنا في ولادها انها ليست من هذا النوع "والحمد لله" .
الفتاة المصرية الغلبانة البسيطة اللي مفيش حيلتها غير كرامتها " وللأسف طعنوها في كرامتها ".رفضت تقابل حاكم البلد وقائد المجلس الاعلي للقوات المسلحة..!!!!!
ربنا يخليكي لأهلك اللي ربوكي وعلموكي ومن حقهم يفرحوا ببنتهم اللي رافعة رأسها ورأسهم وكرامتها عندها اهم من حياتها... ويبارك في كل بنات وشباب مصر اللي زيك.. اللي طول ما هما موجودين مفيش خوف علي بلدنا ومستقبلنا ومستقبل عيالنا من بعدنا. الشباب هم اكبر ضمانة ان الثورة لن تموت..
فاتقوا الله فيهم واحذروهم..
وارحموا مصر..MK

كرامة الوطن من كرامة مواطنيه البسطااااااااء قبل الأغنياء!!!!

طبعا أغلبكم ان لم يكن كلكم شوفتم المؤتمر الصحفي وردود الافعال عليه من مختلف الفئات الرافضة والمؤيدة ومش حضيف لحضراتكم حاجة بالكلام في البيان ومحتواه لأنكم عارفينه أحسن مني ....
أنا حتكلم عن ما لم يحتويه البيان سهوا أو عمدا مش هتفرق خلاص!!!!!... 
- فين الكلام عن حقنا في التظاهر وكرامتنا التي هي من كرامة الوطن,, دا حتي المجرم له حقوق ومفيش حاجة أو حد في الدنيا " كل المخلوقات والحيوانات تحديدا " تقبل التفريط في كرامتها. ليه عاوزينا نفرط فيها ؟؟؟؟ دي كرامتنا هي كل ثروتنا والحمد لله لان هي والستر كفااااااااية أوي...
- فين حق الناس اللي اتسحلت والعالم كله شافها وهي بتتسحل والناس بدل ما تسأل هي ليه يتعمل فيها كده؟؟؟ وبأي حق تعملوا التصرف الحيواني اللي اتعمل في بنت أرجل من أي واحد في البلد؟؟؟ بيسألوا هي عملت ايه ونازلة ليه وكانت ناوية تعمل ايه بعد ستة أشهر ولونها المفضل ايه " في ناشط كبيييير. سأل هو العسكري لابس كوتشي ليه؟؟؟!!! " وان شاء الله ربنا والشباب الغلابة من بعده هيجيبوا حقها أسرع من المتوقع...
- طيب فين حق الناس اللي استشهدوا بطلقات في الرأس أو تأثرا بجراح الرصاص...
- طيب بلاش,,, فين حق الناس اللي اتسممت عيني عينك علشان يفضوها سيرة ويروحوا بيوتهم!!!
- فين العقول المدبرة للناس اللي عرضتم صورهم النهاردة؟؟؟
- فين حق شهداء محمد محمود؟؟؟
- فين حق شهداء ماسبيرو؟؟؟
- فين حق شهداء موقعة الجمل؟؟؟
- فين حق شهداء ثورة يناير؟؟؟
- فين حق أهالي الشهداء عند مسرح البالون؟؟؟
- فين حق مصابي الثورة؟؟؟
- فين حق خالد سعيد؟؟؟
- فين حق سيد بلال؟؟؟
طيب عاوز أشوف أي حد اتحاسب علي أي حاجة غير الثوار ومسجوني الرأي وما أكثرهم
" لدرجة ان بحساب عدد المعتقلين في هذه المدة من بعد الثورة نجده رقم قياسي جديد!!! ثورة بقي وبتنضف البلد!!! ,,,
فعلا,, بس ان شاء الله عمرها ما هتفضي من ولادها وبناتها الثوار والمدافعين عن البلد والشعب وحقوقه وحريته. اللي مش مهتم بيها الناس اللي لم يجربوها ويعرفوا قيمتها!!!.
يارب أشوف أي حاجة صح اتنفذت وهأكون أول من يتكلم عنها لأني بانظر قدامي مش ورايا لأن حماية مصلحة البلد اهم من حماية أي واحد في البلد,,,,
- صحيح بالمرة قبل ما أنسي,,,فين الأيدي الخفية؟؟؟.MK

أين الحياء؟؟؟

اللي أنا شايفه ( ويارب يكون غلط ) اننا خلاص ماعدناش بنحس ولا نخجل ولا نستحي... للأسف الناس اللي تشوف شبابها بيتقتل ويتهان ويتسحل وتنتهك حرمة بناتنا علي أيدي جيش بلدهم "اللذي لا يجرؤ يرفع عينه في جندي اسرائيلي".... وتسكت ..تبقي ناس لا تستحق لقب "بني آدم". وياريت سكوت وبس!!! لأ تلاقي ناس مغيبين طالعين يقولوا وهما ايه اللي خلاهم يعتصموا ؟؟؟. والسؤال اللي بيخافوا يسألوه لنفسهم هو ( ايه السبب اللي يخلي الجيش يضربهم بالنار ؟؟؟؟ هما عملوا ايه يستحقوا عليه الموت؟؟؟؟ ) هو ده السؤال اللي العلم كله بيسأله لأنهم عاوزين يعرفوا الحقيقة.. أما عندنا,,, الناس عارفه الحقيقة بس خايفه تقولها!!! وأحب أقول لهم :صدقوني ربنا مش هيسيبكم لأن ذنبكم لا يقل عن ذنب الكلاب اللي عملوا كده في شباب مصر الحر. وياريت لما الجد يبدأ بلاش تنزلوا الميدان خليكوا في بيوتكم لأن الميدان للرجالة والبنات اللي الواحده منهم =100 راجل مش لأشباه الرجال والمنافقين والجبناء اللي مصممين يعيشوا كالقطيع.. وللأسف هما السبب في اللي بيحصل للثوار لأن صمتهم خياااااااااااااااااااانة.MK

إرحل وعارك في يديك

لااااااا تعليق!!!...

حسبي الله ونعم الوكيل,,,

"صلاحية مباركة"...

السيد الأستاذ الدكتور رئيس مجلس الوزراء...
البلد بتولع والمجلس الاستشاري علق أعماله لحين اعتذار الجيش للثوار...
الثوار رافضين التفاوض لعلمهم لأغراض ونوايا من يفاوضونهم...
كل النخبة والقوي السياسية رفضت وقالت موقفها اللي ضد موقف الجيش...
البلد كلها ضد أي اعتداء علي خلق الله في أي مكان في البلد...
دا حتي المجلس العسكري طلع كذب كعادته وبكل ..... أنكر استخدام أي عنف تمااااااما!!!
االلهم امنحني نعمة التنااااااااحة,,,
التناحة أهم مبدأ في اختيار القادة والمسؤولين...
وعلشان كده مفيش أمل من التفاوض مع الحفيرات دي فعلا...
بس اللي هيجنني الانكار المستمر والدائم لاستعمال القوة!!!
وانت بقي فين يا جنزوري من ده كله؟؟؟
ولا حتي تويت صغنطط تطمنا عليك!!!
أقولك حاجة
"""""صلاحية مباركة""""".MK

هنخسر ايه؟؟؟

هو الانسان امتي يكون متفائل ؟؟؟ وامتي يتقال عليه متشائم ؟؟؟.
لما يكون مخنوووووءءء من حاجات كتير قوي والضغط عليه لا يطاق ,,,, ومفيش حاجة حواليه ماشيه صح وبالرغم من كده بيحاول يكمل عادي خاااااااالص !!! بس علي قد ما بنهزم الحزن وندفنه جوانا أوقات كتير , بس الحزن كمان بياخد حقه مننا ويسيب جروح لا تندمل...
يعني من الآخر كده كده كسبانين حاجات وخسرانين حاجات تانية " أيهما أهم" ...
وماذا أهم من الكرامة؟؟؟!!!..
بنهزم الحزن ؟؟؟ آآآآه....
بنكمل حياتنا ؟؟؟ آآآه....
ساعات بنمثل السعاده واحنا من جوانا آخر همممم ؟؟؟ آآآه....
لاااااااااااا بس دي مش أسباب... ولا مبررات للتشاؤم ...
علي فكرة كلنا كده وده الطبيعي محدش يخاف علي نفسه. بس المتفائل هو اللي بيكمل للنهاية وينتصر مرات وينكسر مرات أخري ..والمتشائم بيتلكك علي أي سبب للهروب من أي مواجهه لأنها خسرانه مسبقا "" طبقا لطبيعته المتشائمة الكئيبة"".
وفي النهاية بنكتشف ان الكنز هو الرحلة نفسها مش اللي في المغارة...
ياريت نفهم الدنيا بسرعة " زي الأفلام العربي من أول شوت". منهم لله فهمونا ان كل حاجة سهلة. ...
بس المبرر الوحيد للانهزام والانكسار هو الموت. تشاؤم يعني خوف يعني جبن يعني تموت ألف مرة وانت عايش !!! مع انها موتة واحدة وبايد ربنا مش بني آدم!!!
بلاش تشاؤم أو احباط أو يأس.... هنخسر كتييييييييير
ربنا يوفقكم ويوفقنا.MK

" علي قد علمي "...

لما قعدت وسرحت في بناتي ومستقبلهم وطموحاتي بالنسبة ليهم وهما أكيد هيبقي ليهم رأيهم المخالف لرأيي
زي ما كنت طول عمري بأتمرد علي أي سلطة من اي نوع حتي أقرب الناس ليا المتمثلين في أهلي " قبل الزواج"و " بعد الزواج "أهلي ومراتي وبعد كام سنة لو لينا عمر هيبقي أهلي ومراتي وعيالي ولو ربنا مد في عمري هيبقي أهلي ومراتي وعيالي وصحتي .
المهم حاولت أحط نفسي في موقع أي مسئول عند البلد في الفترة القادمة وحاولت طبقا لخبراتي المحدودة ونظرتي المحلية وتطرف رأيي لجهة ميدان التحرير " للأسف ما إحنا بقينا جهات كتييييير"علي طول الخط ومن اول يوم ولما نزلت الميدان حسيت بحاجات مفيش عندي استعداد أتخلي عنها لأي سبب..... ووسط الحسبة الشخصية الصعبة بالنسبة ليا وممكن حد تاني يختلف مع رأيي وده حقه بس نفسي ألاقي اضافات جادة نستفيد منها كلنا بعد إذن حضراتكم قولوا عاوزين ايه علشان نطلع بالبلد من الكبوة دي بسرعة ونحقق الحلم اللي استشهد علشانه أطهر شباب البلد؟؟؟؟؟ 
دي شوية حاجات أنا شايفها مهمة ولازم تتنفذ بسرعة " علي قد علمي وفهمي "
1- إقرار حد أقصى للأجور 50 ألف جنيه وحد أدنى 1200 جنيه أي بنسبه 1:41 من قيمة الحد الأقصى وتطبيقها فوراً وإقرار إعانة بطالة أو توفير فرص عمل للعاطلين أو توزيع أراضي زراعية عليهم بكافة التسهيلات والضمانات المطلوبة ورفع المعاشات بما يتناسب مع الحد الأدنى للأجور.....
2- تعيين وتثبيت جميع المؤقتين واحتساب فترة عملهم كمؤقتين من فترة خدمتهم مع مراعاة حق ذوي الاحتياجات الخاصة في نسبة 10% من التعيينات وتطبيق قانون العمل على القطاع الخاص والرقابة على تطبيق ووقف تعيين أبناء العاملين وتكون الأولوية للكفاءة والتخصص.
3- تثبيت الأسعار ووقف ارتفاعها الغير مبرر والتصدي للاحتكار ومحاربته للقضاء على جشع رجال الأعمال وتأميم أموال رجال الأعمال الفاسدين وردها إلى مستحقيها من عمال وفلاحي مصر، والوقف الفوري لتصدير السلع الأساسية من أرز وزيت وسكر ودقيق وغااااااااز لأي دولة أياً كانت إلا بعد سد الاحتياج الداخلي والوصول إلى الاكتفاء بأسعار مناسبة للمواطن المصري وفي حالة تصدير الفائض يصدر بأسعار التصدير العالمية.....
4- وقف المحاكمات العسكرية للمدنيين وإعادة محاكمة كل من تمت محاكمته عسكريا أمام القضاء المدني والإفراج عن كافة المعتقلين السياسيين والإفراج عن ضباط التحرير الشرفاء وإلغاء قانون الطوارئ فوراً....
5- إعادة الأمن للشوارع واتخاذ كافة الإجراءات للقبض على الخارجين عن القانون فوراً وإعادة هيكلة جهاز الشرطة ومحاكمة جميع المتهمين في قضايا تعذيب وقتل 
6- تطهير جميع الوزارات والمؤسسات والهيئات والمحافظات والمحليات والاتحادات والنقابات من فلول الحزب الوطني المنحل والذين تم تعيينهم بإشراف أمن الدولة وتقديم الفاسدين للقضاء العادل ومنعهم من السفر والتحفظ على جميع أموالهم وممتلكاتهم ....
7- إصدار الموافقات اللازمة لعمل نقابات للمهن والحرف المختلفة (السائقين - الإعلاميين - الفلاحين - .....) على أن تكون مستقلة ويشرف القضاء على انتخاباتها ويطبق ذلك على كافة النقابات الموجودة بالفعل، واستقلال الهيئات التي يجب استقلالها كهيئة الطب الشرعي، القضاء، الإعلام، الصحافة، ....)
8- وضع خطة زمنية قابلة للتنفيذ للقضاء على العشوائيات وتوفير حق المسكن لقاطني القبور والشوارع والمستحقين وتحويل جميع مقار الحزب الوطني المنحل لدور رعاية لأطفال الشوارع وتقديم لهم الرعاية الصحية وحق التعليم والعلاج النفسي والاجتماعي ليعيشوا كرماء في بلدهم.
9- تخصيص لجنة بوزارة الخارجية لاستقبال كافة شكاوي المصريين بالخارج للعمل على حل جميع مشاكلهم حلول فورية وخاصة مشكلة الكفيل وتحكمه في أرزاقهم بغير وجه حق وإعادة كرامة المصري ورد اعتباره في جميع الدول .
10- التكريم المستحق ومنح أرفع الأوسمة لأهالي شهداء الثورة " يناير - ماسبيرو - محمد محمود " ولمصابيها وتقديم العلاج الكامل لهم على نفقة الدولة وسفر من يحتاج العلاج بالخارج. ..................................................................................
ياريت أعرف رأي حضراتكم عاوزين إيه تاني؟؟؟؟...MK

بسم الله الرحمن الرحيم.... الاجابة تونس

بسم الله الرحمن الرحيم.... الاجابة تونس
ماهو الفرق بين تونس ومصر ؟
سؤال اجباري لازم كلنا نفكر في اجابته "وياريت من غير نفسنه"...
مصر فيها اخوان وسلفيين ... تونس فيها اخوان وسلفيين...
التيار الاسلامي محقق اغلبيه في مصر " طبقا لنتائج أول مرحلة من الانتخابات البرلمانية"... التيار الاسلامي محقق اغلبيه في انتخابات تونس ...
التيار الليبرالي غير منظم في مصر ... التيار الليبرالي غير منظم في تونس ...
المجلس العسكري يدير شئون الحكم في مصر ويشرف على المرحلة الانتقالية .... الجيش سلم السلطة من أول يوم لحكومة انتقالية وأتمت مهمتها بكل نجاح...
(((( وهو ده الفرق الوحييييد ))))
تونس النهارده انتخبت رئيس الجمهورية وبتعمل الدستور الجديد الي هيعبر بالتأكيد عن الثورة...
واحنا بنولع ونخون في بعض كل دقيقة من اليوم , وعلى أفضل الظروف هنخلص في يوليو القادم , ان كان ليكم ولينا عمر , للي وصلوا له في تونس النهارده ...
حسبي الله في الناس اللي ماشية بالبلد عكس الزمن...
1000000000 مبروك لشعب تونس وعقبالنا يارب.MK

كنت ناوي أتكلم وأقول وأشرح وأفهم.....بس الصراحة الصراحة لقيت إني مش هعرف أقول أي كلام احسن من كلام  "هشام الجخ" والاعتراف بالحق !!!!( لا  بيقولوا  مؤاخذه في الكلمة ) فضيلة =مع إن مرادفها " أذية وتنكيل وقلة أدب وسفالة " في نظر أولي الامر مننا والناس اللي بيطبلوا وراهم وأي حد بيطبل ورا أي حد في البلد   ربنا يقوينا عليهم أجمعييييييييييييييين. آميييييييييييييييييين.MK

أنا الشعب!!!

كان في مؤتمر صحفي للواء مختار الملا مع صحفيين أجانب "فقط!!!!!" امريكان وبريطاني دون وجود أي صحفي أو اعلامي مصري واااااحد!!!. المهم لو عرفنا سيادته قال ايه هنعرف السبب. سيادته قلل من اهمية سيطرة الإسلامين علي البرلمان لأنه برلمان لا يعبر عن كل الشعب المصري "علي حد تعبيره" مش منتخب زي المجلس يعني!!!!, والرسالة التي أراد سيادته توصيلها للخارج أن المجلس هو البديل الوحيد المتوفر في مصر للإسلاميين للرد علي مطالبهم بنقل السلطة لمجلس مدني... وطبعا سيادته ما نسيش يأكد أن المجلس هيسيطر علي لجنة كتابة الدستور ومفيش داعي للقلق من الاوضاع في مصر لأن "كله تحت سيطرة المجلس". يعني من الآخر الاخوان والسلفيين والليبراليين وشباب التحرير وحزب الكنبة والاعلام" طبعا بعد تعيين اللواء أحمد أنيس" وأي حد وكل حاجة في مصر لا تعبر عن الشعب المصري "المجلس والمجلس فقط وممكن العباسية".أنا مش هقول رأيي بس عاوز أوضح لحضراتكم أنهم كده هيحرقوا البلد عن طريق الوقيعة بين التيارات السياسية الليبرالية والدينية لأستمرار قبضهم علي السلطة ليس حبا في الكرسي ولكن هربا من الحساب..MK

يا تري مين أرجل واحد في مصر؟؟؟

اللي مش عارف مين ده؟؟؟.المواطن المصري طبيب الاسنان أحمد حرارة صاحب الواحد وثلاثين سنة الذي فقد عينه اليمني في 28 يناير  نتيجة "طلقات خرطوش غادرة في وجهه وعنقه"... ولكنه أصر علي دعم الثورة للنهاية واستمر تواجده في الميدان في كل الاحداث والمليونيات حتي الآن!!!! وللمرة الثانية فقد عينه اليسري في الاحداث الاخيرة" وبنفس الطريقة القذرة الجبانة... طلقات خرطوش في الوجه!!" . ولكن هذا لم يزيده الا اصرارا علي مواصلة الثورة للنهاية.وكل اللي أقدر أقوله عليه: ربنا يجازيك ويعوضك بكل الخير يا بطل. عرفتنا يعني ايه "ثاااااااااائر" وعلمتنا يعني ايه كلمة "رااااااااااجل".MK