دمنا بقي رخيص ليه ؟؟؟

احنا السبب للأسف لأننا بطلنا نحترم أي حاجة حتي الموت !!!
للأسف مفيش في مصر أرخص ولا أكتر من الدم وهي السلعة الأكثر اقبالا للتجارة فيها لأنها مربحة وممكن تقلب الخاين بطل والعكس بمجرد كتابة كام كلمة وشوية شحتفة ودمعتين وكام لايك ومشي حالك !!!
الحاجة الوحيدة اللي كانت بتوجعنا بقينا نطلع نشمت في بعض ونشتم في بعض وفي اللي ماتوا كمان !!!
أحترامنا لنفسنا ولأحزان الناس بقي مجرد تاريخ بعيييييييييييييد !!!
البلد بقي فيها لونين بس أحمر وأسود ...
اللون الأبيض أختفي من حياتنا ومش موجود غير علي العلم وللأسف الأعلام منكسة لأننا في حداد !!!
مستحيل يتساوي بين دم الشهيد ودم الإرهابي اللي غدر بيه , بس في الآخر كل الدم حراااااااااااااااااااام ...
ياريت اللي مش قادر يفرق أو مش عاوز يحترم الموت أو مش عارف لأنه لم يفقد عزيزا عليه يسكت أحسن ما كلامه يوجع ناس موجوعة لفقدان أهاليهم وأبنائهم ...
الصمت أحسن من التجارة في الدم حتي لو عن جهل أو عدم قصد ...
لازم نرجع نحترم الموت ونراعي حرمة الميت ووجع أهله وإلا نبقي مجرد قطيع من الحيوانات المفترسة بيقتل في بعضه ...
رحم الله شهدائنا وأسكنهم فسيح جناته ... MK

أنا تبع بلدي مش تبع حد تاني !!!

كل اللي أعرفه البلد ومصلحتها ومصلحة شعبها حتي المغيبين منهم ...
وحرام كل الدم المصري حراااااااااااااام , واللي كنا بنشتكي منه مش هيعجبنا دلوقتي ...
بس مع الظلم والقهر اللي وصل للقتل والاختطاف في بعض الاحيان كنا بنقول يا رب ...
لكن لما تلاقي ولاد بلدك بيقولوا يا غرب ويا مجلس أمن ويا أوباما ويا ويا لازم تقلق من موقفهم ورغبتهم المستميتة في السلطة ولو علي أنقاض ولاد بلدهم يبقي لازم نقلق ونخاف منكم وعليكم والله العظيم انتوا انضف واطهر من كل قياداتكم ...
جثة الشهيد مش مكتوب عليها جيش ولا شرطة ولا اخوان ...
مكتوب عليها مصري غلبان مات علشان غيره خد قرار غلط أو تاجر بيه وضحك عليه ...
يعني من الآخر ذنبه في رقبة كل مصري عايش في البلد ومش خايف عليها ولكن خايف علي نفسه وبس ...
ياريت نحترم حرمة الموت بجد وندعي ليهم ولبلدنا وبس ...
حسبي الله ونعم الوكيل ...MK

كليب عمرو قطامش " تمرد " 2013

كل سنة ومصر بخير ...

كل سنة وشعب وجيش مصر بكل خير ووحده وإخلاص ...
طبعا كلنا شفنا الميادين والاحتفالات بنصر العاشر من رمضان وبالثورة كلها اللس عمرها ما هاتموت ما دمنا عايشين ...
الظريف ان منصة رابعة احتفلت معانا وطلعوا واحد ملثم لابس أفرول بطل استخدامه واسبلايت بدلة علي الافرول يعني آخر كدب جهل ...
كدب لأن مفيش ضابط جيش واحد يرضي يطلع ملثم ويسخبي ودي حاجة أنا متأكد منها ...
مفيش ضابط جيش ممكن ينزل يروح لمنصة القتلة اللي لسه قاتلين ضابط بالمعاش وسحلوه لمجرد انه ضابط !!!
مفيش ضابط جيش يأمن علي حياته أصلا وسط أكبر تجمع للارهابيين مع ان في ناس محترمة مضحوك عليها واقفة بس المنصة والقيادة للخونة والارهابيين وبس !!!
يا ريت الاراجوز اللي عمل فيها ضابط يعرف انه عمل جناية انتحال صفة ضابط بالجيش وان الاخوان أو من معهم مش هينفعوه لما يشرف في السجن قريب ان شاء الله ...
الموضوع مش تحيز أو عنصرية كلنا ولاد ناس غلابة من الشعب بس احنا أكتر ناس نعرف كويس ده ضابط ولا لأ ؟؟؟
تحيا مصر والثورة مستمرة ... MK

قائد شريف + جيش وطني = شعب مطمئن

ربنا يرفع راسك زي ما رفعت راس كل واحد ينتمي للجيش الشعبي الوطني المصري بتاع الغلابة ... 
شكرا ... MK

لا للإنتقام واللهم لا شماتة ...

مش عاوزين شماتة وتشفي وتصفية حسابات ولا تعميم لأن في ناس في التيار الإسلامي كان موقفها صح وأنصاعت لإرادة الشعب وأولها حزب النور وفي ناس تانية مش مصدقة ان جماعتهم بالضعف ده ومصدومة صدمة ممكن تفوقهم ويعرفوا ان الموضوع سياسة مش تجارة بالدين ومعتقداتنا وأركان اسلامنا اللي هو أكبر منهم كلهم بس في الأول والآخر مش هنعمل زيهم لأننا بنفهم وبنحس وبنراعي غيرنا أكتر منهم ومن تشددهم وكذبهم وتضليلهم وحالة الانكار الغرييييييييييييبة ...
علي قد ما استغربت من موضوع قفل القنوات التحريضية التخريبية الارهابية بس للأسف هما مش بيقدموا إعلام ولا دين ولا سياسة , أغلب برامجهم خلط سياسي في اطار الدين منه برئ وحتي شاشاتهم عليها تحريض صريح علي القتل وكمية من الأكاذيب تولع الشرق الأوسط كله مش مصر بس . وكلام عن الشرعية الشرعية الشرعية ومفيش حد بيتكلم عن الشريعة !!!
الموضوع سياسة وبزنس وبقذارة ... وآخرتها دعوة للجهاد ضد المشركين اللي هما أنا وأنتم وكل رأي مخالف يقول الموضوع سياسي مش ديني ولا شرعي ده حتي حزب النور السلفي خونوه !!!
أنا موافق لحد ما يرجعوا قنوات دينية اسلامية مش تحريضية تخريبية ارهابية ... MK

هي جماعة dont mix !!!

بعد سنة من حكم الجماعة للبلد اللي مبقتش بلدنا وبقت بتاعت الاخوان اما الكفرة اللي زينا اللي وقفوا معاهم كانت النتيجة ... dont mix
أما المجلس العسكري أيامها كانوا حبايب وبرضه ... dont mix
ودي كانت بداية التمثيلية بتاعة البرلمان وبرضه ... dont mix
وجت مرحلة الحكم الفعلي والتحالفات والتربيطات وأخرتها ... dont mix
طيب والتحالف مع السلفيين والاسلاميين " قولا " ... dont mix
طيب الاعلام ... dont mix
طيب الشرطة ... dont mix
طيب الجيش ... dont mix
طيب القضاء ... dont mix
طيب والمثقفين والعياذ بالله ... dont mix
طيب الدول العربية ... dont mix
طيب افريقيا ومنابع النيل ... dont mix
دول حتي مع بعض في القرارات بتاعتهم ... dont mix
طيب نعمل للناس دي اييييييييييييييييييييييه ؟؟؟
مش هتنفع تبقي البلد اخوان وبس , نفسي أعرف مين اتحالفتم معاه وركبتم علي كتافه ولم تنقلبوا عليه ؟؟؟
أكيد العيب عندكم يا شباب الاخوان ولا كل دول متآمرين وخايفين من نجاحكم العظيم ؟؟؟
فوقوا انتوا بقيتوا بطولكم في البلد والكل غسل ايده منكم خلاااااااااااااااص
يا اما تعيشوا معانا وتفتكروا ان في ناس غيركم في البلد وتشاركوهم الحكم بجد يا بتوع " مشاركة لا مغالبة "أو تغوروا وكفاية قرف وفشل وفضايح وشوفوا المكس بتاعكم في بلد تانية مع شعب تاني ... MK

هو دومة قال أيه غلط ؟؟؟

بيقولوا انه أهان الرئيس ليه هو قال ايه غير الحقيقة !!!
قال مرسي قاتل زي مبارك ... دي الحقيقة
قال مرسي كداب ... والله والله والله صح
قال مرسي فقد شرعيته ... من تصرفاته وتخبطه
قال مرسي فاشل ... البلد كلها شايفة ده .
دي مش اهانات دي صفات وتصرفات وأفعال مرسي عملها !!!
يبقي ليه البهدلة وقلة القيمة دي كلها ؟؟؟
شوفوا البلد كلها لما الكهربا بتقطع بتقول ايه علي مرسي واللي جابوا مرسي !!!
هتقطعوا الكهربا والمياه والبنزين والسولار والهوا وبرضه مش هنسكت ... MK

ألحقوا العساكر المخطوفين , اتقوا الله !!!

يعني مش كفاية حرق دم واستهتار بأرواح الغلابة وأهاليهم ...لسه هاتقعدوا تتعرفوا علي بعض ؟؟؟ 
وياريت سمعنا أي قرار أو أي حاجة غير " كل الخيارات مفتوحة !!! " يا ولاد ال ... 
والرئيس المستفز يقول كلام يحرق الدم وطبعا هيتقال ان الراجل كلامه إتفهم غلط ,,, كويس ان في ناس فاهمه حاجة من كلامه ده إنجاز يحسب ليه ...

كلكوا عارفين هم فين , وشيوخ القبائل حلقوا للكل حلاقة صح ؟؟؟
ومعذورين لأنهم برضه ليهم أهل وعشيرة !!!
منه لله بقي ...
أرجع أقول للسادة الخاطفين "ربنا يطمن الريس عليهم ويريح قلبه " :
هم الغلابة اللي اتخطفوا هما اللي عذبوا قرايبكم ؟؟؟
اللي حصل ده غدر وخيانة للبلد مفيش تفاوض ولا رغي , في ناس في الجيش ممكن تروح تحررهم وترجع وانا متاكد من ده , يبقي مستنيين أيه ؟؟؟
مش هتاجر بألام حد تاني ,بس مش كل مره هتعدي ومحدش يعرف مين ولا فين ولا ازاي " معلش ساعة فطار وكل سنة وانتم طيبيين "...
شكلنا بقي زبالة لما نتخطف في البلد اللي المفروض نحميها وكل ساعة تأخير هتكسر رقبة الجيش في سينا اللي ناسها وأهلها لا تحترم الا الجيش !!!
هو في إيه ؟؟؟
حرروهم وبعدين اعملوا أبطال علي بعض براحتكم !!!
لسه دم ال16 شهيد اللي اتغدر بيهم في رمضان سخن حرام عليكم ,
انتم عندكم عيال , اتقوا الله ... MK

تمردت وللا لأ !!!

حملة تمرد , التوقيع مش كفاية !!أكيد أنا وناس كتير مستنية تخلص من حكم الاخوان ومن يدور في فلكهم بس يا تري التوقيع كفاية ؟؟؟ بعد ما معركتهم مع القضاء تخلص وييجي دور النشطاء والاعلاميين بجد بقي مش قرص ودن هيبقي التوقيع كفاية ؟؟؟ياريت اللي يوقع يبقي عارف انه فعلا ممكن ييجي الوقت اللي يتمرد بجد وينزل الشارع ويقول كفاية ....الموضوع بجدمش حبر علي ورق ... MK

خطابات خلدها التاريخ !!!

للسادات .. خطاب الحرب ..وخطاب الكنيست ... وخطاب الفتنة الطائفية .. وخطاب زيادة الدخل القومى وعائدات القمح ...

ولعبدالناصر .. خطاب التأميم ...وخطاب التنحى .... وخطابات عظيمة هزت مصر ..

ولمبارك ..عنق الزجاجة ...وعنق الزجاجة ..وعنق الزجاجة..وعنق الزجاجة ..

ولمرسي ... الحارة المزنوقة ... وال 75643 ... والصوابع اللى بتلعب فى مصر..والصوامع اللى بتتخزن فى القمح ...

التاريخ لا ينسى ... ولا ينافق ...

منقول عن واحد محسور

!!!!!!!!!!!!!!!!!!!

الثورة خلعت النظام علشان تحرر الشعب ,,,

والإخوان بيحرروا النظام ويسجنوا الشعب !!

شامم ريحة ماسبيرو !!!

مش عارف آخرتها إييييييييييييه ,,,
حتي الجيش اللي كنا فاكرينه استوعب الدرس وانحيازه للشعب بجد مش كلام مدرعاته بتضرب الناس في بورسعيد من شوية ...
وقمة الكوميديا انك تقرا ان وتشوف الصورة وتلاقي اللي راكبين علي المدرعة أفراد في زي شرطة ....
لو فرضنا واتعمينا واستطعبتنا وقولنا ان الدبابة اتسرقت " زي ماسبيرو وما أدراكم ما ماسبيرو " علي رأي رئيسنا أبو دم خفيف يبقي أحسن لنا نبيع الدبابات دي ونكسب فيها قرشين قبل ما كل حاجة تتسرق أو سعر الحديد ينزل بلا وجع دماغ ...
ولو كان الجيش هو اللي ضرب تبقي دي مصيبة تانية خاااااااااااااالص ...
ربنا يستر ونلبس في المصيبة الاخف ضررا ...
وهنرجع تاني نتسأل نموت بالسم أو الرصاص ؟؟؟
مش فارقة ...MK

دوخيني يا لمونه !!!

انا كنت في بورسعيد النهارده وشفت كل حاجه بعيني محدش قاللي ... ويا ريتني ما روحت ولا شفت ولا عرفت ...
الوضع هناك كألآتي :
الشرطة بتدافع عن النظام بكل استماته ... والجيش بيدافع عن الشعب ومش عاوزها تخرب أكتر من كده ... لما الناس وقفت في حماية الجيش قامت الشرطة ضرباهم مع بعض !!!
لو ده رد النظام علي موضوع التوكيلات يبقوا ناس مش فاهمه حاجة ...
هما لازم يخافوا من الجيش بس من غير ما يحاربوه من تحت لتحت لأن العملية واضحة وخايبة ومش جايبة همها م الآآآآآآآآآآآآآآآآخر ...
الفرق بين السيسي وطنطاوي ان السيسي مش متورط مع أي حد في أي حاجة غلط وفعلا خايف علي البلد مش علي نفسه وطبعا دي حاجة ترعب اخواننا في النظام لأن الولاء لمصر وللشعب تعتبر خيانة عندهم ...
الجيش ليه غلطاته بس ليه رصيد عند الناس ...
الاخوان ملهمش أي حاجة حلوة تخلي الناس تتعاطف معاهم أو تأيدهم أو حتي تديهم فرصة تانية بعد الفشل الذرييييييييييع ده ...
وشكلنا كده بعد ما كنا بنقول يسقط يسقط حكم العسكر هنرجع نقول واحد اتنين الجيش المصري فين ؟؟؟
ده حصل في بورسعيد وطنطا والمنصورة والبقية تأتي ...
وكأننا بنلف في حلقة مفيش فيها حد ينفع يحكمنا ...
وهنعيد الثورة من أول وجديد !!!
ودوخيني يا لمونه ... MK

اشكري يا انشراااااااااااااااح ... MK

كلنا حماده صابر ,,,

سألتم نفسكم في كام مليون حماده صابر تاني في مصر ؟؟؟
طيب ايه اللي خلي الراجل ده يخاف وايه ممكن يحصل له أكتر من كده ؟؟؟
حد عنده فكره ايه اللي حصل فيه او عنده ايه يخاف عليه أصلا ؟؟؟
حد عارف ايه نوع التهديدات او اتهدد بأيه أو بمين من أهله ؟؟؟
حد في مصر كلها يضمن سلامته وسلامة عيلته ولحد أمتي ؟؟؟
طبعا كله بأمر الله ولكن مين يستحمل أذي لعائلته وبسببه ؟؟؟
حد فينا عارف أزاي يجيب حق الراجل ده بعد ما فرط فيه بالاكراه ؟؟؟
أنا سمعت كل عيلته وبناته وولاد عمه بيتكلموا للأعلام وبيكدبوا كل كلامه بس خايفين عليه وخصوصا انه موجود في مستشفي الشرطه , يمكن كلام غير مقنع لناس كتير مننا بس أنا مش عارف أحط نفسي مكانه علشان أعرف أحكم علي تصرفه ده لو لينا حق نحاسبه !!!
بلاش ندبح بني آدم غلبان ونشيله أكتر من اللي هو فيه قبل ما نعرف ابه اللي حصل وايه اللي خلاه يقول كده.
بلاش احنا كمان نمسك ف الضحية وننسي الجلاد ...
بلاش نطنش ونقول هو ساب حقه وهو غلطان وهو ... وهو ...
وبما اننا كلنا شوفنا الفيديو واللي حصل فيه ياريت نفكر في حقه ونرحم الراجل وعيلته من الرعب اللي هما فيه , ربنا معاهم ...
وانا متأكد أنه هيقول الحق قريبا جدا ...
لازم نحاسب الجلاااااااااد وإلا هنبقي كلنا حماده صابر قريبا جداااا ...
حسبي الله ونعم الوكيل ... MK

خلص الكلام ...

انتهى وقت الكلام.. وبدأ زمن الفعل.. لازم تنزل الشارع بكرة.. لازم تغير..
لازم تستعيد قرارك فى يدك..لازم ترجع مصر المخطوفة مرة أخرى.

إذا كنت تريد ثلاثة أرغفة فى اليوم وتتنازل عن حقك فى الحياة الكريمة خليك فى بيتك.

إذا كنت توافق على أن تتحمل من جيبك خطة فشل الإخوان.. وأن تدفع ضرائب من دخلك المحدود.. حتى يسيطر الإخوان على حكم مصر خليك فى بيتك.

إذا قررت التنازل عن حريتك.. وان تقطع لسانك، وتسمح للإخوان ونائب عام مرسي أن يجروك على المحاكم إذا قلت أه.. خليك فى بيتك.

إذا كنت توافق على بيع مصر لقطر وحماس، وأن تفقد مصر كرامتها وتتحول لتابع لدولة فى حجم الخيمة خليك فى بيتك.

إذا كنت توافق على استمرار شهر العسل بين الإخوان وإسرائيل، على حساب المصالح العليا للأمة .. خليك فى بيتك.

إذا كنت توافق على عودة مصر محمية أمريكية برعاية إخوانية.. وألا ترفع رأس بلدك بين الأمم خليك فى بيتك.

إذا كنت توافق على حل قطع يد الشرطة والخضوع لجماعات الأمر بالمعروف والنهى عن المنكر فى الشوارع خليك فى بيتك.

إذا كنت توافق على الحياة بدون قضاء عادل.. ونيابة تدافع عن حق الشعب والمواطنين خليك فى بيتك.

إذا كنت توافق على فصل سيناء عن مصر وتحويلها إلى وطن بديل للفلسطينيين من أتباع حماس فى غزة خليك فى بيتك.

إذا كنت توافق على أن تتحول مصر إلى أفغانستان وتحتضن القاعدة وكل التنظيمات المتطرفة خليك فى بيتك.

إذا كنت توافق على التحول من مواطن إلى عبد.. خليك فى بيتك وتمتع بزمن العبودية .... MK

ميعادنا بكره في الميدان ...

انا عن نفسي نازل علشان بلدي وشعبها ومستقبلها ومستقبل عيالي ...
اللي مش هيقدر يروح التحرير عنده 100 ميدان تحرير في كل حتة في مصر ...
المهم رسالتنا توصل لو عاوزين ثورتنا تنجح ...
لازم ننزل كلنا علشان دم اخواتنا الشهدا والمصابين ...
صدقوني ,, مصر تستاهل اكتر من كده بكتييييييييير ... MK

اشكري يا انشراح !!!

استعدوا لسماع نغمة التبرير لحادث قطر البدرشين واختاروا :
----------------------------------------------------------------
لسماع نغمة "هو مرسي اللي كان سايق القطر؟" اضغط 1
لسماع نغمة "ادوله فرصه" اضغط 2
لسماع نغمة "مهو واخد بلد خربانه" اضغط 3
لسماع نغمة "هنصرفلهم تعويضات" اضغط 4
لسماع نغمة "هنعمل لجنه تقصي حقائق" اضغط 5
لسماع نغمة "المؤامرة" اضغط رقم 6
لسماع نغمة "ماهى المعارضة السبب" اضغط رقم 7
لسماع نغمة "ماهو مينفعش معاكم الراجل المحترم مرسى وانتم تستاهلوا مبارك" اضغط رقم 8
لسماع نغمة "هو كل حاجه الرئيس الرئيس؟؟" اضغط رقم 9
لسماع نغمة "أصل الفلول هم السبب" اضغط رقم 10
لسماع نغمة "أصل الإعلام هو اللى بيهوّل ولازم يتطهر" اضغط رقم 11
لسماع نغمة "هو انت كنت تقدر تتكلم كده أيام مبارك؟" اضغط رقم !!...MK

1000000000000 مبروك لأرجل ناس في مصر ...

حمدا لله علي سلامتكم يا أبطال مخافوش يقولوا كلمة حق في وجه سلطان جائر ومش هيخافوا وعلي ضمانتي لأن هو ده الفرق بينهم وبين المواطن العادي ...
كلنا متربيين كويس وكلنا ممكن نوصل السجن علشان بندافع عن كلمة حق ...
بس مين فينا يخرج من السجن يوم الجمعة ويروح يتظاهر ويعمل مشكلة ترجعه السجن علشان خاطر زمايله اللي في السجن ؟؟؟ 
تاني يوم والله , مييييييييييين ؟؟؟
ورغم كده تلاقي ناس الضعف والخوف واكل من عضمهم يطلعوا يقولوا كلام للتشويه وخلاص ,,, وربنا يسامحهم علي الافترا علي خلق الله ...
بس مين فينا يخرج من السجن يوم الجمعة ويروح يتظاهر ويعمل مشكلة ترجعه السجن علشان خاطر زمايله اللي في السجن ؟؟؟
تاني يوم والله , مييييييييييين ؟؟؟
البطل اللي أعرفه شخصيا من الرجالة هو وديع ( الملازم أول / محمد طارق الوديع ) ...
يمكن يكون الأصغر سنا بس القيادة في دمه وظاهره في معظم تصرفاته ,,,
قائد وزعيم ومحرض وشهيد كلمة حق وأي حاجة تمس كرامة بني آدمين ... حتي لو مالوش أي علاقة بيهم !!!
هو اتربي كده لأن أبوه ( لواء بالمعاش / طارق الوديع ) كان كده ولما اتشرفت بالقعدة مع سيادته عرفت ازاي وديع بقي كده !!!
انا أكيد اكبر منه سنا ورغم كده اتعلمت منه حاجات كتير في فترة قصيرة وبأعتز بصداقته وبالفترة دي من عمري ...
واتعلمت منه اكتر لما ربنا اختبره والظلم نال منه ؟؟؟
وعلي فكره اللي عارفينه كويس عارفين انه ولا فارقه معاه حاجه وعمره ما هيندم علي موقفه أبدا ...
ايمانه مصبره ... وكانت الحاجة الوحيدة اللي توقفه هو خوفه علي الناس اللي بتحبه ويحبهم ...
في عز محنته كان مش عاوز برد علي تليفوناتي ولما وصلتله لقيته بيقوللي انا خايف عليك انت !!! في حد كده !!!!!!!!!!!!!!!
انا كنت بشوفه لما ييجي يصحيني في صلاة الفجر بكل الطرق الرزلة , المهم أصحي وانا اصحي اقوم واتوضي واصلي واتعب وهو ياخد ثواب علي قفايه ... معلش اخويا الصغير مش خسارة فيه ...
والمكان التاني كان الجيم وبصراحه انا مش غاوي الجو ده خالص وفكرة اني اربي عضلات لسه ما وصلتنيش ...
والمكان التالت كان قعدة الكلام في السياسة والدين والفن والكورة والهلس ... وأي حاجة ممكن يتكلم فيها شباب كلهم رجاله مع بعض ... علي اختلاف الرتب العسكرية والسن ...
وفي كل مكان وديع سايب بصمة ,,, وكان ممكن يقعد مع اي ضابط من حوالي 50 موجودين معاه وعنده قبول غريب من عند ربنا ...
وسبحان الله كنت ألاقي الجبناء والمنافقين عندهم حساسية منه , وطبعا عارف ليه ؟؟؟
حتي في الصفحة دي اللي اتشرفت بأنه كان أدمن معايا أول ما بدأنا نكتب سوا وكان بيكتب بأسم MW .
انا عن نفسي لو عندي ولد اتمني يكون زي محمد وديع ...
لو جه واحد زي محمد يتجوز بنتي هأبقي أسعد الناس ...
حمدا لله علي سلامتكم يا أبطال ...
ومتأكد ان ربنا هيعوضكم عن كل دقيقة ظلم بكل خير ...
لأن ربنا هو الحكم العدل ...
حمدا لله علي سلامتك يا وديع , وعلي فكرة انا قولتها للسيدة الفاضلة البطلة المؤمنة الصبورة والدتك قبلك انت لأني عارف فرحتها أكتر منك ...
عقبال كل مظلوم في كل مكان في الدنيا يا رب ... MK

صكوك بطرس غالي بقت اسلامية !!!

كل البلاوي اللي حصلت في مصر كوم وموضوع الصكوك اللي بيقولوا انها اسلامية بالكدب طبعا , كوم تاني خالص ...
كنا بنقول علي عصابة مبارك خونة لأنهم باعوا البلد للأجانب والمنتفعين لما فلسوا وبعد 20 سنة من حكمهك الاسود ...
طيب المفروض نقول ايه لما الحكومة الاسلامية تبيع او تأجر كل حاجة في البلد بعد كام شهر بس !!!
لو كل مصيبة هتعملوها تلزقوها بالكدب في الاسلام يبقي عليكم السلام لأن النهاية قربت جدااااااا...
كفاية نصب باسم الاسلام ...
كفاااااااااية يا اخواننا لو كنتم فعلا مسلمين . MK