مبروك علينا الدستور وعقبال كتب الكتاب ...

زي ما كنا عارفين لبسنا والحمد لله في حيطة اسمها الدستور ...
ولسه في بلاوي كتير أوي هتحصل واحنا لسه بنعتصم ونعمل مليونيات يوم الاستفتاء وبننقسم بين معارض ومقاطع ومطنش واحنا اللي نستاهل طبعا !!!
لما بعد كل ده وتبقي نسبة التصويت كده يبقي تهريييييييييج..
واحنا اللي هنجيبه لنفسنا بالكسل والتطنيش وبعدين نقعد نعيط ...
اللي حصل حصل خلاص ولازم يصلحوا غلطتهم مع البلد والشعب بالزوق او بالعافية ان شاء الله حتي في القسم ...
ده الشرف يا ناس ...MK

حطها في جيب سيادتك وسكتم بكتم !!!

حد خد باله ان من ضمن السلع اللي الرئيس مضي قرار بزيادة أسعارها وتاني حاجة زادت بعد التبغ هي أستغفر الله أستغفر الله الكحوليات !!!!
فلوس ضريبة الكحوليات وغيرها بتدخل خزينة الدولة الله يرحمها ...
يعني احنا هنتعالج ونتعلم ونقبض مرتباتنا بفلوس حرام ؟؟؟
للأسف معركة الشريعة ونصرة الاسلام  هي معركة مصالح سياسية , مش أي حاجة تانية لأن الشريعة مش هتتطبق زي ما الجماعات الجهادية مثلا عاوزة وبيقولوا علي الدستور كفر !!!
بس يا عيني هما مضطرين يقفوا جنب حامل كتاب الله السيد الرئيس ضد كفار الثورة لأن ده واجب شرعي !!!!!
بلاش ضحك علي الناس ,,,
دي سياااااااااااااسة والموضوع مفيش فيه شريعة ولا دين ...
الكدب أول طريق الضلال ولا لأ ؟؟؟؟
الكل بيكدب من أول الرئيس إلي أصغر مسئول وعلي الهوا ...
كل حاجة تبعا للمزاج والمصالح السياسية وبس ...
تبقي دي معركة شريعة ولا دين !!!
دي سياااااااااااااااااسة . MK

تكرار مملللللللللللللللللللل !!!!!

واقع صعب ومتأزم وحاكم مـتأخر كالعاده وخطابات قلتها أحسن ...
اللي بيحصل ده حصلنا كتير مع الفرق في الشخصيات والاسماء ...
نفس الوضع أو أخطر شوية ونفس الطريقة ونفس التجاهل والوصف بالبلطجة والعمالة والكنتاكي والجبنة النستو وكل مرة ؟؟؟
الكلام ده قاله مبارك وردده طنطاوي وكرره مرسي بالحرف الواحد مع زيادة واحده وهي حسرته المبالغ فيها علي عربيات الرياسة !!!
وللأسف كل واحد 

منهم منجاهل الشعب ومعتمد علي حماية الشرطة " مبارك" , والجيش "طنطاوي" , وشباب التيار الاسلامي "مرسي" ,,,
والنتيجة واضحة ومعروفة ومكررة والموضوع كله مسألة وقت ...
اللي نعيده نزيده !!!
وكل مرة لازم خيرة شباب البلد يدفعوا التمن بدمهم ...
بس مش هيتفع نقسمهم لمؤيدين ومعارضين لأن كلهم شباب مصر !!!
ربنا يهدينا كلنا ونرجع تاني إيد واحده ضد الظلم ونظامه وفلوله ...
رحمة الله علي كل شهيد مصري ...
وربنا يشفي المصابين ويرجعهم لأهلهم علي خير ,,,
لك الله يا مصر ...MK

برافووووووووووووو ,,,

برافو للأخوان والنخبة والسلفيين والليبراليين والمثقفين والاعلاميين والقضاة واي حد بيعمل اي حاجة في اي مكان لأي سبب !!! 
ومن غير سبب  كمان ... عادي
عادي جدااااااااااااا , احنا في مصر .
كلكم خايفين أوي علي مصر ؟؟؟
وعندكم اسنعداد تموتوا علشان خاطر وطننا ماما مصر ؟؟؟
اختلفتم في كل حاجة واتفقتم في الكدب والخداع وتضليل الشعب ,,,,
كلكم ممكن تتحالفوا مع الشيطان علشان مصلحتكم !!!
اللي هي طبعا مش مصلحة مصر  
وابقي سلملي علي مصر ...
اه ياكدابين !!!!!!!!!!!!!!!!!!!!!!!!!!!!!!
حسبي الله ونعم الوكيل. MK

رحم الله شهداء مصر المغتالين غدرا علي حدودها ...
وياريت ميكونش دمهم رخيص وننساهم هما كمان ...
البقاء لله ... MK

عاوزين تعرفوا نجحنا في ايه ؟؟؟

احنا خلينا الفلول يهتفوا  " يسقط يسقط حكم العسكر " ...
احنا خلينا 13 مليون واحد مصري يفرحوا حتي لو فرحة منقوصة مش علشان مرشحهم اللي انتخبوه نجح , لأ علشان شفيق سقط !!!
احنا ادينا الناس امل في التغيير وان دي بلدهم وممكن يغيروها ...
احنا خلينا كل المرشحين لحكمنا يبقوا مننا فعلا مش اسياد وعبيد ...
ياريت بقي نبدأ نتحرك ونفكر في الاعلان الدستوري المكمل علشان يبقي عندنا رئيس بجد مش واحد نطلع نشتم فيه لأنه معملش حاجة وهو معندوش صلاحيات بجد  ,, مش زي بتاعة الجنزوري !!!
واهلا بمعارضة الاخوان والضغط عليهم علشان نتقي شر صفقاتهم وعمايلهم السودا بس نسلمهم السلطة بجد المرة دي وبعدين نحاسبهم وهم عارفين ان نص اللي انتخبوا مرسي مش عاوزين الاتنين بس بيكرهوا النظام اللي شفيق بيمثله مش حبا فيهم !!!
ده احنا خلينا الخبير الاستراتيجي الانتخابي السياسي د. توفيق عكاشة يقول علي حملة سيده شفيق حملة فاشلة !!!
 طب ده مش كفاية ... MK

عزيزي البلوفر ,,, Game over

والله يا فندم كل كلمة وحكمة سيادتك بتطلع تقولها وتتحفنا بيها بتأكد اللعبة الوسخة اللي رمتك علينا مرة تانية ومبروك عليك الكرسي يا برنس وربنا يعوض علينا في جزمنا ...
مهما مرسي واخوانه واللي هيأيدوه حتي من الناس اللي عمرها ما ايدت الاخوان كنا هنعمل في نفسنا عمله هباب ونستحملكم بدل ما تحصل كارثة وييجي الشفيق بس الحمد لله خلصت ومبروك علينا الفريق ومبروك عليه توكيل الجزم اللي هيفتحه بعد أسبوع واحد !!!
لأن الساده الاخوان مش عاوزين يعقلوا ويركبوا المركب الصح مرة واحدة بس , ولما لا قدر الله مرسي يسقط برغم ان الانتخابات اللي فاتت كان فيها 14 مليون صوت ضد النظام زي ما هما بيفكروا هيرجعوا تاني .
ولو اتكلموا ولا البرلمان فكر هيحل المجلس بالقانوووووووووون .
وطبعا عدم العزل عند المقدرة مش عيب وبالقانوووووووووون ..
يعني هيرجعوا الميدان غصب عنهم تاني وهنبقي في الهوا سوا !!!
يا ناس يا اخواننا احنا معاكم انتم وغيركم من المصريين ايا كانت ديانتهم او لهجتهم او . طول ما انتم مظلومين واصحاب حق بلاش تضيعوه وتشتركوا في انتخابات انتوا عارفين نتيجتها وبعد النتيجة تطلعوا تقولوا قانون العزل او انها مزورة ومنيلة بستين نيلة لأن ساعتها هيبقي شكلكم ايه ؟؟؟
في ناس كتير قوي في البلد بتفهم وبتفكر وبتفتكر وبتعرف تميز المواقف والتصرفات الغلط من الصح !!!
واهلا بالفريق موحد الميدان والقوي والتيارات كلها في الميدان ...
بلا انتخابات بلا رئاسة بلا دستور بلا قلة قيمة ...
هو صيف باين من أوله ...MK

ضباط 8 ابريل ...

يا تري لسه فاكرينهم ؟؟؟
فاكرين محمد وديع اللي بيطلع من قضية للتانية ؟؟؟
فاكرين احمد شومان ؟؟؟
فاكرين المقدم ايمن سالم ؟؟؟
طيب لو نسيتوا كعادتنا السيئة , لما سمعتوا حكم البراءة علي قادة الداخلية مافتكرتوش ان في ناس اتفرمت من غير ما تعمل حاجة ؟؟؟
انا عارف ان اللي عمل حاجة صح هو مقتنع بيها عنده استعداد يموت علشانها لأن الحق أحق ان يتبع , بس الظلم بيولد قهر ومرارة ...
والاخطر ان طعم المرارة مش هيروح حتي باعدام مبارك واعوانه , لأن اللي اتظلم عمره ماينسي الاحساس ده ابدا ربنا يكفيكم القهر ...
بس الحاجة الوحيدة اللي ممكن تسعدهم هي انهم يشوفوا الثورة بتنجح والبلد حالها بيتغير والناس فهمت واتعلمت من غلطها ...
لازم نتأكد ان كل بطل منهم كان عارف اللي هيحصل ومش خايف ومش مستني من حد مننا ولا من غيرنا حاجة ...
بس اقل تقدير وواجب وحق ليهم اننا نفتكرهم !!!
اوعوا تنسوا حد ضحي علشاننا من أول خالد سعيد لحد النهارده ...
احنا عندنا اصل وفاكرينكم ومش هننساكم او ننسي فضلكم علينا ...
اوعوا تنسوا ضباط 8 ابريل ... MK

الفرق الكبير بين تنفيذ القانون , وتحقيق العدالة !!!

انا زي ناس كتير كان نفسي اسمع حكم اعدام لكل خاين قاتل سارق ناهب قامع كان في القفص او في طرة او لسه بره هربان او موجود في الحكم وعامل فيها حامي الثورة !!!
بس احنا كلنا كنا عارفين ان النيابة طلع عين ابوها علشان تجيب دليل واحد يثبت تورط القتلة " ده قناص العيون اللي مصر كلها شافت الفيديو بتاعه طلعوه كان في وقت خدمة " يعني م الآخر الورق ورقنا !!!
اوعوا تنسوا ان الادلة مسئولية المباحث مش النيابة ولا القضاء , اوعوا تنسوا ان القاضي بيحكم بالورق اللي قدامه مش بضميره ولا بمزاجه ولا برأي الشارع لأن تطبيق القانون مش هو العدل دايما .
للأسف , انا محبط زي ناس كتير وحاسس ان دم الشهداء في رقبتي زيك بالضبط بس الحل مش في سب القضاء ولا النيابة وننسي اللي عمل فينا كده من اول يوم ومصمم يكمل لآخر ساعة في حكمه علشان يجيب الشفيق اللي هيأمن خروجهم من السلطة ده لو خرجوا ...
الحل في اننا نتفق ونطلع قرارات ونفضل في الميدان وبكره هتلاقوا كل اللي بيقولوا دلوقتي ان ده غلط هم اول ناس تحتفل بنجاح الميدان زي ما شتموا الثورة والثوار وكانوا اول ناس احتفلوا بيها , ما كلنا عارفينهم !!
لازم نتفق , ونوفر جهدنا للأيام الطويلة اللي جاية لأن نظام مبارك بقي أقوي من زمان ونجح يفرقنا ويمكن الحكم ده يكون سبب في تجمعنا تاني وهو ده الصح مش الشتيمة والتقطيع في بعض ...
لازم نفرق بين القانون والعدل والقصاص والغل والجاني والضحية ...
بالبلدي كده احنا لو مش متفقين علي اي حاجة في حياتنا لازم نتفق ان عدونا كلنا واحد ومعروف ...
يسقط يسقط حكم العسكر ..
الثورة مستمرة . بجد مش كلام . MK

لا لشفيق و1000 لا للفلول !!!

هي دي اقرب حاجة للحقيقة المرة اللي عايشينها واللي هنعيشها علي ايد كل واحد متورط في دم اطهر شباب مصر ولو بتوزيع البونبوني . MK

هتعدي علي خير ان شاء الله ...

مش عاوزين حد يقلق او يخاف او يكون رأيه سلبي والحل الوحيد لضمان سلمية اليومين دول ومصلحة البلد اننا نشارك في الانتخابات ...لازم كل واحد ينزل ويختار المرشح اللي هو شايفه هيخدم البلد مهما كان اسمه او انتماؤه السياسي او .. او . المهم ننزل ننتخب !!!
لو عاوزين مصلحة البلد وامنها يبقي هننزل ننتخب ...
لو خايفين من التزوير لازم ننزل ننتخب ...
ده حق بلدنا علينا . MK

نتائج الاستفتاءات تزود القلق وترفع الضغط !!!

كل ما الناس تتكلم عن شفيق وتفضحه وتقول فلووووووووول أسهمه تزيد في الاستفتاءات المختلفة !!!
هو في كده ؟؟؟
حسب الله ونعم الوكيل ... لما الناس تتهاون في دم الغلابة وعاوزة تضيعه وتجيب واحد من العصابة تاني علشان كل المتهمين يطلعوا براءة ويدخل السجن مكانهم كل واحد شريف وخايف علي البلد !!!
لما شفيق يعرف يوقع بين البرادعي وعصام سلطان ويشغلهم عن موضوع الارض بتاعه يبقي عيب عليهم هما مش عليه ...
كل مؤتمرات الراجل مليانة حزب وطني وبكل بجاحة طلعوا من تحت الارض تاني وبكل بجاحة !!!
سامحوني لما اقول انا خايف وقلقان ومش عارف البلد ممكن تروح فين لو ده حصل ,,, هيبقي كابوس .
أيوه خايف ... MK

احنا لسه بنقول يا هادي !!!

لما شوفت أول مناظرة مصرية لمرشحي الرئاسة من شوية عرفت احنا قد ايه كان مضحوك علينا ومهضوم حقنا ...
للأسف , ,من سوء حظي اني شفت مناظرات رئاسة كتير في امريكا ولسه شايف مناظرة فرنسا من كام يوم ...
غصب عني لقيت نفسي بقارن بيننا وبينهم من غير ما أحس " لو حسيت كنت هقفل البرنامج وأقوم أنام " ...
طبعا كان في حاجات حلوة ومفيدة وايجابية بغض النظر مين استفاد منها من المرشحين الاتنين وان كان ابو الفتوح أصدق أكيد !!!
بس كان في أسئلة واجابات فكرتني بأيام سودة عدت علينا وواضح انها سايبة جوانا عقد وأمراض مالهاش حل قريب ...
وفي حالة من عدم الثقة هنعاني منها كتيييييييير الايام اللي جاية ونبرة التخوين والتكذيب هتعلي عند الكل , بس معلش ...
الموضوع يستاهل , واحنا لسه علي أول سلمة والخبرة بتيجي من التجارب مش من الكتب . وان شاء الله هنتعلم ...
ايوه هنتعلم ونبقي زي الفل مهما غلطنا هنستفيد من غلطاتنا لأني أول مرة أحس بتغيير كان الليلة دي رغم كل المصايب اللي بتحصل في البلد وبتزيد كل ما ميعاد الانتخابات بيقرب , بس في تغييييييييييييير .
كل شئ بطئ , وممل احيانا , بس التغيير بيحصل صدقوني !!!
عاوزين شوية صبر وأمل في ربنا وثقة في نفسنا وساعتها هنحس بالتغيير اللي بنحلم بيه من زمان وبقي قريب اكتر من أي وقت ...
طول ما في أمل وصبر هيبقي في تغيير ...
ده حق بلدنا علينا . MK

كله بينفخ في النار ويولعها أكتر ليه ؟؟؟

الغباء والغشم بقي العامل المشترك بين كل الأطراف اللي المفروض انهم عاوزين يبقوا مسئولين عن البلد وكل واحد متمسك برأيه الغبي المتخلف ومصممين نكمل المدبحة !!!
ناس طالعة تقول حي علي الجهاد وأحلوا حمل السلاح ومواجهة الجيش واحتلال وزارة الدفاع ...
وناس تانية طالعة تقول المفروض الجيش يقتل كل المتظاهرين والمعتصمين لأنهم خونة وعملاء وهم السبب ...
وناس تالتة اخدت السلاح ونزلت تجاهد ضد العسكر !!!
وناس رابعة دخلوا المسجد بالجزم علشان يقبضوا علي الحريم !!!
وناس خامسة بتقول المشكلة بين الاسلاميين والمجلس العسكري , واحنا مالنا !!!
والدم بقي أرخص حاجة عندنا ويمكن مالوش قيمة أصلا !!!
طيب بعد ده كله عاوز حد منهم يجاوب علي السؤال ده ..
الشهداء اللي سقطوا من الشعب والجيش مين مسؤول عن دمهم ؟؟؟
الجيش ؟ البلطجية ؟ حازم صلاح ابو اسماعيل ؟ أهل العباسية ؟ القوي السياسية ؟ الفلول ؟ أنا ؟ حد منكم ؟؟؟
الله أعلم . MK

رش الميه في عز الحر مش عداوة !!!

بالرغم من ان المنظر في العباسية بينكد علي كل الشعب المصري سواء كان رافض او موافق علي الاعتصام واسبابه بس النهارده كان في موقف كوميدي مش عارف هو مقصود وللا لأ ....
انا مش مع السلفيين في الاعتصام ده , ومش علشان مواقفهم لما طلعوا قالوا علي البنت اللي اتبهدلت علي ايد العسكر في التحرير كلام متخاذل ويحرق الدم الا انهم في الآخر مننا واحنا منهم وواجب علينا نقف معاهم لما الموضوع يوصل للبلطجية والقتل والدبح وده سر تعاطفي ...
واللي زود التعاطف الشعبي النهارده هو الهجوم الوحشي علي الخيام وحرقها لمحاولة فض الاعتصام بالقوة كالعادة الغبية المتأصلة عندنا ...
طبعا بعيدا عن هتافات " الشعب يريد اعدام المشير " , " والله زمان وبعوده , ليلة أبوكم ليلة سودة " , .... كان مدفع المياه هو المطلب الاكبر من المتظاهرين وكلهم كانوا بيتسابقوا علي الوقوف امامه لأن الميه في الحر ده حاجة حلوة مش عداوة وخصوصا ان ضغط المياه كان ضعيف ومش بيعمل حاجة غير تلطيف الجو الحر !!!
انا مش مع الاعتصام من الاول , بس مع المواطن اللي من حقه يقف في اي حته في البلد يتظاهر أو يعتصم أو يعمل اللي هو عاوزه بدون ضرر للغير او اذي لأي مواطن تاني ... ده حقنا
وموافق جدا علي التظاهر والانصراف في نفس اليوم لأن بكل أسف أي اعتصام عندنا بينتهي بالدم ...
كفاية دم ... MK

معاملة العبيد ,,, ومعاملة السبايا !!!

مفيش حد مسك البلد وفكر يحترم عقلية الشعب " حتي المنتخبين " اللي هو من أذكي الشعوب وأكثرها فهما وتفهم للواقع !!!
كل واحد ربنا يكرمه ويلاقي نفسه في السلطة وموقع المسئولية ينسي كل اللي كان بيعاني منه ويفتكر حاجة واحده بس , ازاي يخبي الحقيقة علي الشعب لأنه لسه يا عين أمه بيبي ومش هيقدر يفهم الحقيقة بسهولة أو يتقبل الواقع , معرفش جاب الكلام ده منين ؟؟؟
الكلام من نوعية " اللي ايده في المية " , والكلام سهل " , وتعالوا اشتغلوا شغلنا " , واحتكار معرفة مصلحة البلد علي ناس معينة ده أكبر غلط لأنه بيخلق نوع من الشك والتحفز والشد والجذب اللي احنا في غني عنه وكفاية اللي احنا فيه ...
مش هينفع نشيل نظام كان بيعاملنا معاملة العبيد , ونجيب ناس تعاملنا علي اننا سبايا حرب وأسري " غزوة الصناديق " ...
كل واحد فينا بقي عاوز مترجم علشان يفهم التاني بيقول ايه !!!
ومع اقتراب زفة انتخابات الرئاسة بتزيد الصفقات والتنازلات والتحالفات ومحدش فاهم حاجة ولا عارف آخرة التمثيلية دي إيه ؟؟؟
رربنا يستر .
وبعد إذن الوايت نايتس هشير الاغنية دي ...MK

ليه كلهم بيمثلوا حب مصر ؟؟؟

للأسف كل المتنافسين علي التورتة الرئاسية مفيش حد فيهم بيحب البلد أو عاوز يخدمها بجد وكله بيدور ازاي يحمي مصالحه ومصالح حزبه وجماعته وأنصاره انما مصر مش في الدماغ أصلا !!!
من أول الأخوان لأولاد أبو اسماعيل للعباسيين , حتي الثوار وقعوا في بعض ومش عارفين نصوت لمين لحد دلوقتي ,,, طب وبعدين !!!
كله بيهرب من الكلام في القضايا الأساسية سواء الداخلية أو الخارجية , يعني من الآخر هننتخب فلان علشان تاريخه وسلوكه وبس ولا برنامج ولا نيلة وكفاية اشتغالات ...
طيب لما العملية كلها مصالح في مصالح بتجيبوا حب البلد في النص ليه ؟؟؟ . ما تجيبوا من الآخر واحنا برضه هنفهم وندور علي مصلحة البلد .
الواحد كان بيقول معلش أول مرة ننتخب بجد وبكره نتعلم , بس للأسف الموضوع بقي لا يحتمل لأن في ناس تانية عندها بجاحة لا متناهية وناس تانية عندها لا مبالاة لا تحتمل ومفيش حد وسطي ...
لازم نفوق ونتفق علي مرشح واحد يمثل الثورة والثوار بجد , مش واحد فلول أو متسلق أو متأسلم أو منافق أو كداب , وما أكثرهم !!!
الكورة في ملعبنا للمرة الثالثة " بعد الاستفتاء والانتخابات البرلمانية الوهميين " ولازم نستغلها صح المرة دي لأنها الأخيرة ...
اصحوااااااااااااا ...
التالتة تابتة . MK

خطة محكمة متخرررررش الميه !!!

احنا بينضحك علينا وبمزاجنا ...

ويمكن دي اغرب حاجة في الشعب ده , مع العلم ان التطنيش ده مصيبة بس بيبقي وراه مواقف وطرائف بتحصل واحنا بنتفرج !!!
يمكن التأخير الزمني ال " time delay " زي مابيقولوا هو السبب في اننا بنقعد نتفرج مدة طويلة علشان نفهم ان ده بيحصل فينا . ممكن ؟؟؟
المهم , خلاصة الفرجة ايه ؟؟؟
الخلاصة :
- التطنيش له حدود هو كمان , زيه زي الصبر كده ...
- آخرة التطنيش وحشة علي الطرفين " المطنش " و " المتطنش " ...
- التأخير المتعمد في الوصول للحقيقة بقي هو لغة التفاهم السائدة ...
- آخرة التأخير في اي مشكلة بتحصل بيكون كالعادة قرار بهتان من ايد مرتعشة , ولا يرجع الحق او ينصف مظلوم , ولا حتي يبل الريق ...
- تمثيلية الحرائق في السويس ومشاكل السلوم والانفلات الامني المدبر وللأسف بتزيد كل ما نقرب من اي حدث مهم حتي ولو كان تمثيلية انتخابات الرياسة اللي شكلها كده مش هتتم في ميعادها ..
- أي حد من السلفيين او الاخوان يطلع يشتم في المجلس بيكون لسه مخلص الصفقة ومظبطين كل حاجة سوا وللأسف " في الضلمة " !!!
- تمثيلية حازم صلاح كان سببها الخوف من السلفيين ورد فعلهم , مع ان الحق مع المحكمة وطلع الشيوخ السلفيين الكبار والسياسيين غلطوا الشيخ حازم زي ما الاخوان نقلوا وغيروا لمحمد مرسي بعد خيرت الشاطر وكله ماشي ومحدش فاهم حاجة واهي اصوات والسلام !!!!
- مسلسل المرشح عمر سليمان عاوزين من وراه ايه ؟؟؟ . مش عارف.
والمصيبة الكبيرة :
- بعد سنة وشوية اتضح اننا كنا علي حق وكان لازم الدستور قبل اي حاجة والمجلس مش هيمشي غير لما بطمن علي الدستور ويأمن وضعه فيه بكام مادة ويراضي الاخوة بكام مادة برضه لانهم تعبوا معاه.
تخيلوا كل ده بيحصل واحنا مطنشيين !!!
وبينضحك علينا بمزاجنا وعاملين مش واخدين بالنا ...
الله ينور , كده قشطة ..
لك الله يامصر . MK

دي مش سياسة , ده نفاق !!!

تغيير المواقف بقي طبع فينا خلاص والناس بقت تشوفه علي انه حاجة عادية بتحصل كل يوم ومن كل الناس وكل الجهات !!!
وهي دي المصيبة اننا نبدأ نبرر النفاق والرياء علي انه سياسة , لأ دي مش سياسة ده نفاق واضح وصريح ...
في السياسة تغيير الاتجاهات بيكون مرتبط بالمصالح والتربيطات ولكن عندنا الموضوع كله ابتزاز وادعاء البطولة علي قفا الناس اللي مش فاهمة حاجة للوصول لأغراض ضد كل مبادئ الناس دي ...
يعني من الآخر كده تقنع الناس انك هتنفذ كل احلامهم ومطالبهم وفي الآخر تعمل عكس كل ما وعدت به ...
الاعتماد علي ان الناس بتنسي بسرعة والميديا ممكن تلطف الجو وتقلب الحقائق بقي اسلوب مش جايب همه خلاص .
هما احرار ... بس مش عاوز حد يقول علي ده سياسة ...
ده نفاااااااااااااااااااااااااق ...
والله العظيم نفااااااااااااااق ...
مالهوش اسم تاني نفااااااااااااااااااااااق ... MK

طيب المتهمين المصريين مصيرهم ايه ؟؟؟

كل البلد بتتكلم عن المتهمين الامريكان اللي ضربونا علي قفانا ورموا شوية عضم وخلعوا ونسيوا ان في ناس مصريين ممكن يتسجنوا في قضية ولعبة كانت عبارة عن تمثيلية حلقاتها خلصت خلاص ...
المساواة في الظلم عدل , هما كانوا بيلاعبوا الحكومة الامريكية علشان مصالح مشتركة بين الكل من المجلس العسكري للاخوان مهما انكروا والناس دي حتي لو غلطانة وانا مش عارف الحقيقة بعد كل التمثيل ده مش من العدل انهم يتحاكموا بعد خروج الجناة والشيطان الاكبر حسب كلام قضاة التحقيق وفايزة هانم ابو النجا مش كلامي انا ...
انا مش مع تعطيل القوانين والله بس الجناااااة سابوهم يمشوا خلاص ومن المطار يبقي دول بيتحاكموا علي ايه ؟... خلااااااااص
ولا علشان مفيش ليهم سفارة او اي حد تدافع عنهم وتحميهم !!!
طيب نعمل حملة تبرعات ونلم قرشين ينفعوا البلد في زنقتها !!!
وللا هو لازم السفارة المصرية تتحرك ؟؟؟
وتحياتي للقوانين ودولة القانون ...
انسوا ... MK

الشيخ السياسي , والسياسي اللي بيرفع الآذان !!!

خلاص مفيش حد صادق ولا حد كداب لأن مفيش حق او حقيقة من الاساس وكل حاجة دخلت في بعضها ,,,
ياتريخ هو ده المقصود من التصرفات الغريبة اللي بتحصل حوالينا من كل فئات المجتمع. وكل واحد شايف مصر من نضارة ضيقة واللي بره الصورة يبقي عميل او مأجور او بلطجي او فلول او مبيفهمش حاجة !!!
احنا اللي بنضحك علي نفسنا بالرغم من اننا عارفين مين السبب ومصممين نلف وندور في نفس الدواير ورا نفس الاشخاص ...
ولو سألت في اي موضوع تلاقي 100 اجابة وفي الغالب كلهم غلط ولو دورت علي الحقيقة تتوه ومتعرفش تروح بيتكم !!!
بقي من المستحيل انك تعرف حقيقة اي موضوع وتلاقي كل واحد بيهرب من المسؤلية وفي الآخر منلاقيش حد نحاسبه !!!
كل الاوضاع انقلبت ومفيش حد أو حاجة في المكان الصح وبقينا مش فاهمين كل ده بيحصل ليه وفين وازاي وامتي ؟؟؟؟
س/ عارفين ليه الشيخ راح اشتغل سياسي ؟؟؟
ج/ 1- لأن السياسي بيأذن في البرلمان والعين بالعين ...
2- لأنه زهق من الاوضاع السيئة اللي في البلد ...
3- لأن السياسة الايام دي مهنة الكل ...
وطبعا الباب مفتوح لأجابات اكتر بكتير , وما خفي كان اعظم ...
لك الله يا بلدي .MK

تسقط القوانين وترزيتها , وتحيا أمريكا ومعونتها !!!

زي ما كنت متوقع من اول يوم في موضوع المنظمات الحقوقية والانسانية انها قرصة ودن مش اكتر من كده , ومش عارف الناس اللي عملوا نفسهم متفاجئين كانوا مستنيين ايه يعني ؟؟؟
مستنيين ايه من قوانين لا تطبق علي اي حد " الا الغلابة طبعا " !!
مستنيين امريكا مثلا تسيب مواطنيها في المحنة دي !!! , مينفعش ده يحصل هناك لان تاني يوم ممكن يسقطوا نظام الحكم لو مش بيحمي شعبه ... لان هما اللي عينوا النظام ده من الاساس مش نزل عليهم بالبراشوت في ظروف غامضة !!!
كان واضح ان كده كده الناس دي مش هيحصل لها اي حاجة وكل الورق هيتظبط وآخرها شوية فلوس وغرامات تترمي زي اي عضمة . بس الناس الغلابة صدقوا ان في ناس رجالة ممكن تقول لأ لأمريكا وتقف في صف قانونها وحقوقها في بلدها , فين الناس دي ؟؟؟
مش ممكن حد هيقف ويقول لأ إلا اذا كان بيفكر في الرأي العام والمواطن اللي اختاره يحكم البلد ودي حاجات مش موجودة عندنا .
دي عادات دول ديمقراطية والعياذ بالله مش من عاداتنا الاصيلة طبعا لأنها بدعة وضلالة زي اللييرالية والعلمانية والاناركية و ... !!!
مفيش حد هينفذ رغبة شعب هو ما يعرفش عنه حاجة اصلا وشايف انه وصل للحكم بأوامر من المخلوع واستمد شرعيته من استفتاء معملش من المكتوب فيه اي حاجة !!!
يعني من الآخر كده لازم تكون ردود أفعال المسؤلين مهزوزة وايدهم مرتعشة امام الخارج علشان يكملوا في الحكم ...
وطبعا اسود جائعة علي شعوبها !!!
ولكي الله يا مصر . MK

توأم سياسى - التحرير

توأم سياسى - التحرير

مصر لن تركع ؟؟؟ . لن تركع لكم !!!

فاجئني الدكتور كمال الجنزوري بكلامه عن مصر القوية المتقدمة المزدهره المرعبة المستهدفه اللي مفيش حد فينا يعرفها غير سيادته وحكومته ومجلسنا الموقر ....
مصر اللي العالم كله بيكرهها ومش عاوزها تكمل مسيرة النجاح اوالاستقرار الامني والرخاء الاقتصادي والطفرة الرهيبة اللي عايشينها في كل مجالات حياتنا ...
مصر المستهدفة لان كل العالم الغربي والعربي خايف نبقي احسن بلد في العالم في ظرف خمس دورات انتخابية من حكم العسكر واعوانهم وواجهاتهم !!!
مصر اللي انطلقت بخطوات واسعة وقفزات رهيبة للامام في عهد سيادته !!!
مصر اللي العالم كله خايف منها موجودة في خيالكم انتم وبس يا دكتور ...
مصر مش بتخوف اي حد دلوقتي بعد 30 سنة انبطاح ومهانة بره وجوه , وللأسف كل حاجة زي ما هي من غير اي تغيير يذكر غير في الاسماء والاشخاص وبس !!!
مصر دولة اغلب شعبها تحت خط الفقر واقتصادها ضايع وامنها واقع ومواردها منهوبة وحكوماتها مش بتعمل حاجة غير الكلام والتنديد من غير اي تهديد حتي ...
أرجوكم كفاية , شبعنا من نظرية المؤامرة اللي مفيش حد مصدقها غيركم ...
مصر ممكن تكون مستهدفه من الخارج ومن الداخل وده أكيد وطبيعي , بس للاسف الخطر الاكبر علي مصر هو ولادها اللي مصممين يدمروا كل حاجة حلوة فيها ...
مصر مش هتصدق اي كداب تاني ...
مصر لن تركع ليكم ولأكاذيبكم ...
الثورة مستمرة . MK

عارفين احنا مين ؟؟؟

قال الحجاج بن يوسف الثقفى فى وصيته لطارق بن عمرو حين صنف العرب فقال عن المصريين :
لو ولاك امير المؤمنين امر مصر فعليك بالعدل فهم قتلة الظلمة وهادمى الامم وما اتى عليهم قادم بخير إلا التقموه كما تلتقم الأم رضيعها وما أتى عليهم قادم بشر إلا أكلوة كما تأكل النار أجف الحطب وهم أهل قوة و صبر و جلدة وحمل و لايغرنك صبرهم ولا تستضعف قوتهم فهم إن قاموا لنصرة رجل ما تركوه إلا والتاج على رأسه وإن قاموا على رجل ما تركوه إلا وقد قطعوا رأسه فأتقى غضبهم ولا تشعل نارا لا يطفئها إلا خالقهم فأنتصر بهم فهم خير اجنادالأرض وأتقى فيهم ثلاثا :-
1- نسائهم فلا تقربهم بسوء وإلا أكلوك كما تأكل الأسود فرائسها
2- أرضهم وإلا حاربتك صخور جبالهم
3- دينهم وإلا أحرقوا عليك دنياك
وهم صخرة فى جبل كبرياء الله تتحطم عليها أحلام أعدائهم وأعداء الله
كلام مش محتاج أي شرح أو تعليق ....
الثورة مستمرة . MK

معركة القرن ( النظام vs الثورة ) ...

الشعب كان يريد اسقاط النظام ولكن النظام زي ما هو ليه ؟؟؟
في السنة اللي عدت حاولنا نعمل كل حاجة ما عدا اننا نحط نظام للبلد تمشي عليه , مع ان النظام " السيستم " هو اساس عمل البلد وكل مؤسساتها بس للأسف كلنا بنبص تحت رجلينا ومفيش حد بيفكر أبعد من يومه اللي بيقضيه !!!
يا تري ده نجاح للناس اللي عاوزينا نرجع للأيام السوده علينا وعلي البلد ؟؟؟
ولا ده فشل مننا لأنهم عرفوا يضحكوا علينا ويلهونا في مشاكل مصطنعة ؟؟؟
الواضح كده ان مفيش اي جديد هيحصل علي ايد ناس ضد اي تغيير وكل ولائهم للنظام السابق ومفيش عندهم اي احساس بالمسؤلية او الولاء للبلد اللي عملتهم وخلتهم عايشين في خيرها هما وعيالهم لدرجة انهم مش حاسين بأي حاجة في البلد ولا يعرفوا عنها اي حاجة من الاساس وبقينا احنا في بلد وهما في بلد تانية وكل واحد شايف الامور من وجهة نظره هو وبس طبقا لمعاييره هو !!!
النظام عندنا يعني سيستم للبلد تمشي عليه , اما عندهم فهو ازاي يديروا الفساد والسرقة والنهب ويمصوا دم الغلابة لآآآآآآآآآآآآآآآآآخر نقطة دم عندنا ....
يعني من الآخر احنا بنتكلم عن بلد وهما بيحكموا بلد تانية خالص !!!!!!
طيب نعمل ايه ؟؟؟؟
نعمل ثورة .... بس بجد المرة دي لازم نسقط النظام ....
نسقط النظام مش رموزه واشخاصه ....
المشكلة في النظام مش في الاشخاص اللي بيحكموا ...
الثورة مستمرة .MK

هنموت واحنا بنتعلم ,,, مش عيب !!!

الواحد مننا من غير علم ودماغ شغالة وضمير صاحي يبقي ما يستاهلش يعيش .. اللي مش عاوز يتعلم يبقي مش عاوز يعيش بني آدم لأنه مش هيفهم حاجة ...
واللي مش بيستخدم عقله يبقي عمره ما هيتعلم من المواقف اللي مر بيها ...
واللي ضميره مات يبقي ممكن نعتبره هو كمان ميت لأنه بقي من غير روح ...
واللي من غير قلب يبقي مش انسان لان الحيوانات عندها عقل هي كمان ...
انا مش عاوز اكتب خطبة ولا موعظة لاني مش اهل لها بس الازمات والكوارث والايام الصعبة لازم نطلع منها بحاجات ايجابية تنفعنا , لان الطريقة الوحيدة للحياة الحرة الكريمة هي اننا نتعلم من كل حاجة بتحصل مهما كانت سودة , ولازم هيكون فيها فايدة لينا ولبلدنا لان ربنا ليه حكمه في كل حاجة في حياتنا والضرر مهما كان كبير بس اكيد ليه فايدة وحكمة هتبان لينا بعدين . بس مش معني كده اننا نقعد نستني الحقائق تكشف نفسها لوحدها بالعكس لازم يبقي هدفنا الحقيقة المجردة من اي حسابات او تحالفات او مصالح او حتي مخاوف وهلاوس .
معرفة الحقيقة اول خطوة علي طريق العدالة اللي بنحلم بيها من زمان قوي .
الذكاء والشطارة اننا نحاول نفهم ونعرف اللي حصل ده ,, حصل ليه ؟ وازاي ؟ ....
حصل ليه يعني هنعرف مين سببه وايه غرضه وايه طريقته " لو مش معروفة " ....
حصل ازاي يعني مين نفذه ومين ساعده وايه الغلط اللي وقعنا فيه وايه نتيجته ....
مش صعبة ,,, بس عاوزة نية وشوية تركيز وحبة اصرار اننا نتعلم الدرس ...
وان شاء الله نحول كل خسارة خسرناها لمكسب ومنفعة لبلدنا .
الثورة مستمرة .MK

بسيطة ,,, أنا كمان خط احمر ...!!!.

للأسف , اذ فجأة كل حاجة في البلد بقت خط احمر وممنوع الاقتراب منها او الكلام عنها الا بكل خير وبوس ايادي من اول المجالس الموقرة وما اكترها لوزارة الداخلية لوزارة الدفاع لملف الاقباط للعصيان المدني لمنظمات حقوق الانسان دي حتي ماتشات الكورة بقت خط احمر زيها زي المحاكمات الكرتونية والبرلمان الكوميدي ..!!!!
مع اني زملكاوي ومن صغري بشوف الزمالك بيتروق مع انه بخطين حمر حتة واحدة بس عادي يعني عمري ما عرفت قيمة الخطوط الحمرة وقوتها الا الايام دي بس !!!!
علشان كده قررت :
,,,, بعد اذنكم وياريت حضراتكم تساعدوني انفذ القرار ده
وبما ان الخطوط الحمرا طلعت حاجة كبيرة وانا بجهلي مش عارف قيمتها قررت اني ارشح نفسي خط احمر اليومين اللي جايين يمكن الموضوع يضرب معايا وساعتها مش هنسي كل الناس اللي وقفت جنبي وساعدتني اوصل للي هكون فيه ....
وصدقوني سواء ربنا كرمني وبقيت خط احمر او لأ مش هتفرق في حاجة خالص لاني عملت كده علشان مصر مش علشان مصلحة او منفعة شخصية ..
وساعتها بقي :
وساعتها هقضي علي كل الخطوط اللي في البلد ايا كان لونها لان مفيش حاجة ممنوعة او محرم الكلام فيها غير كلام ربنا ( عز وجل ) ...
ومفيش حد من البشر فوق الحساب لان مفيش حد معصوم من الغلط والتقصير ..
وطبعا هيرفدوني بعد ساعة وارجع تاني لصفوف الجماهير الحرة نحارب سوا كل الخطوط الحمرا والزرقا والصفرا والسودة لأن مفيش خطوط ...
وكفاية علينا أوي الدواير اللي بنلف فيها بقالنا سنة ..!!!.
بلا خط احمر بلا قلة قيمة ومرمطة .
من تواضع لله رفعه .MK

انتوا فاكرينها سايبة ؟؟؟ !!!

لازم كلنا نفتكر انتخابات مجلس الشعب اللي تمت لأول مرة من غير بلطجة ونحط الصورة دي قدام عنينا لما نيجي نقيم أي انفلات امني او حوادث بيقولوا انها مجهولة الفاعل مع ان الفاعل معروف والمتواطيء معروف والمنتفع معروف ومفضوح .
في ايام الانتخابات وضحت الرؤية ووضح التوطؤ والتخاذل المتعمد من الاجهزة الامنية في كل المواقف السودة اللي عدت علينا قبل وبعد رفض وثيقة السلمي اللي كانت عبارة عن صك امان لمن لا يستحقونه لانهم حرمونا منه لاننا طلبنا حقنا وقولنا لأ مفيش حد فوق الحساب وكان الرد الغادر علينا هون استباحة دمنا واعراضنا !!!!
ولما الناس قالت انها عارفة مين الفاعل ومين شركاؤه ومين المتواطئين معاه ومين اللي ساعدوه بتخاذلهم وسكوتهم قالوا عليهم بلطجية ومأجورين وعملاء لجهات تريد هدم مصر ومؤسساتها " اللي هي افضل مؤسسات في العالم بدليل نجاحها " فين الدولة وفين المؤسسات وفين مطالب الشعب وحقوقه .... فين ؟؟؟
فين المجلس العسكري بقراراته وسلطاته ومؤتمراته ودساتيره ووثائقة ؟؟؟
فين وزارة الداخلية بضباطها وجنودها وقنابلهم وخراطيشهم وقناصينهم ؟؟؟
فين البرلمان الشرعي المنتخب يجيب حق الشعب اللي انتخبه واعتمد عليه ؟؟؟
فين النخبة والمثقفين والسياسيين والثوريين من اللي بيحصل للثورة والثوار ؟؟؟
فين النيابة اللي بتحاكم المتهمين بقتل المتظاهرين بأدلة ادانة تطلعهم براءة ؟؟؟
من عاوز يحرق البلد ويقطعها ويفرقها بين مسلمين واقباط ويساريين واخوان وسلفيين وثوريين وبلطجية وبورسعيديين واهلاوية وتحرير وعباسية وشهداء وضحايا ومصابين واغلبية صامتة وفيسبوكيين ومتفرجين ومطنشين ؟؟؟؟
الفاعل معروف ومفضوح !!! بس هو عامل مش واخد باله ومكمل , عادي !!!!
واحنا عاملين مش واخدين بالنا ليه ؟؟؟ مش عادي !!!
حسبي الله ونعم الوكيل .MK

يا تري مين بيحكم مين ؟؟؟

فعلا مش عارف مين اللي بيحكم البلد فعلا ؟؟؟
المجلس العسكري ؟؟؟ يمكن !!!
مجلس وزراء طره ؟؟؟ يمكن !!!
الطرف الثالث ؟؟؟ برضه ممكن !!!
الجنزوري وحكومته ؟؟؟ لا يمكن ...
مجلس الشعب " الجهه الوحيدة المنتخبة " ؟؟؟؟ لااااااااااااااااااا يمكن !!!
بعد مجزرة بورسعيد اكتشفت ان مفيش حد في مصر مسؤول عن اي حاجة , وكل واحد قاعد في مكانه منظر علشان يتخلع منه اول ما تحصل مصيبة ويبقي هو ده الحساب والعقاب " وأهي حاجة تهدي الناس شوية " . حسبي الله ونعم الوكيل ..
كلنا شاطرين نقطع في بعض ونخون بعض وننتقد بعض , ولما تيجي ساعة الجد وتحمل المسؤلية تلاقي كله هرب علي التوك شوز ويقعد يولول ويتاجر بدم الشهداء ويعمل فيها بطل علي قفا الناس الغلابة اللي صدقته وانتخبته أو أيدته وساندته ...
صدقوني الفوضي هي الخطر الحقيقي علي البلد لأنه السبب الرئيسي للفوضي والخراب اللي منتشر علشان مفيش أي حد مسؤل عن أي حاجة في أي مكان في البلد وكأن ده المطلوب تنفيذه وبأوامر من مجلس طره لحماية رقبتهم ..
يعني لو صحينا في يوم لقينا البلد اتباعت " اكتر من كده " لا قدر الله مش هنلاقي حد نحاسبه أو حتي نسأله ده حصل ليه وازاي وفين وامتي ؟؟؟
الفوضي سببها معروف عند الناس اللي مدبرين ده كله ...
وبرضه معروف عند الناس اللي سايبينهم يعملوا كده ...
يا تري احنا كمان عارفين سبب والغرض من الفوضي ؟؟؟؟
اشك , لأننا لو عارفين مش هنسكت ونطنش بالطريقة دي ...
والله أعلم . MK

مين معاه الشرعية الحقيقية في البلد دي ؟؟؟

يعني ايه شرعية ؟ وتيجي ازاي دي ؟؟ وهي مع مين ؟؟؟
الأعداد الكبيرة من البشر اللي نزلوا يوم 25 يناير للشارع علشان يعلنوا تأييدهم للثورة والثوار واستمرار الثورة هو أكبر دليل ان الثورة مستمرة , وان الشعب عارف ان الثوار هما اللي خايفين علي البلد ومش ممكن يخربوها زي ما الاعلام العميل كان بيقول علينا ومن بجاحتهم اتهمونا احنا بالعمالة ومحاولة تخريب البلد ونشر الفوضي !!!!
فعلا ,,, " اللي عنده دم احسن من اللي عنده عزبة " ....
المهم نرجع لموضوع الشرعية .. لازم نتأكد ان الشرعية معانا وده كلام ملايين من الشعب المصري مش كلامي وشفناه احنا والعالم كله يوم 25 يناير 2011 , 2012 ..
ولازم نبدأ نرجع ثقتنا بنفسنا ونعرف ان الشعب المصري لسه ورانا وموافق علي اهدافنا لأنها أهداف الثورة اللي ماشفناش منها حاجة لغاية دلوقتي بسبب التأخير المتعمد ...
لازم نتأكد أن الناس عارفة نبل النوايا للثوار الحقيقيين ومتأكدة أكتر مننا لأنهم شافوا ده بعينهم من سنة بالتمام والكمال وعارفين الشباب المصري ممكن يعمل ايه ? وازاي ؟؟؟
الشعب واثق فينا وفي نوايانا وأهدافنا وبيدعمنا ونزل يقول انه معانا لغاية ما اهداف الثورة تتحقق , يعني من الآخر كده مفيش حد ليه حجة انه يكسل ويبطل يطالب بحقوق بلده ..
الشرعية مش انتخابات ولا استفتاءات ومجالس اكتر من الهم علي القلب من غير لازمة .
يارب اكون فاهم صح ..
الثورة مستمرة .MK

صفقات مشبوهه وريحتها فايحة ..!!!

رغم اعترافي الكامل بدور جماعة الاخوان المسلمين كجماعة وطنية معارضة بس غلطتهم في حق بلدهم المرة دي كبيرة ومينفعش تعدي لأنهم لسه بيقولوا يا هادي في الحكم ,,,
مفيش حد في البلد مش عارف أو شامم ريحة الصفقة المشبوهة اللي تمت في الخفاء بين المجلس العسكري وجماعة الاخوان , كل البلد عارفة ما عدا شباب الاخوان الغلابة اللي كانوا في الميدان بيدافعوا عن موقف مش مقتنعين بيه من الأساس , وما أكترهم ....
بعد ما الجماعة اتحولت من محظورة الي اغلبية برلمانية فجأة صحيوا لقوا نفسهم في وش المدفع علشان كده سايبين الحكم للمجلس ومش عاوزين يشكلوا حكومة أو حتي يطالبوا بالحكم لأن الظروف الصعبة اللي بتمر بيها البلد ممكن تستعصي عليهم, وتقلل من شعبيتهم ورصيدهم في الشارع , وعليه قرروا انهم يقعدوا يتفرجوا ويسيبوا الجنزوري وحكومته يشيلوا الليلة واتخلوا عن البسطاء اللي انتخبوهم وكان أملهم فيهم كبير ....
طبعا الموقف فيه من الانانية والتحايل والخداع من كل الاطراف ما فيه , بس برضه فيه حاجات مفيدة لأننا عرفنا ان التعامل مع الجماعة المعارضة غير التعامل مع حزب الاغلبية البرلمانية.
احنا دلوقتي في مواجهة ناس معاها شرعية ومش عاوزة تحكم ,, وناس تانية مفيش ليها أي شرعية ومش عاوزة تسيب الحكم الا بشروطها المستحيلة التنفيذ !!!!
المجلس مش عاوز يمشي الا لما ياخد ضمانات وتطمينات وتعهدات كافية تضمن عدم محاسبتهم علي جرائمهم في الفترة اللي فاتت من ماسبيرو لمحمد محمود لمجلس الوزراء لأن الجرائم دي عقابها العادل انهم يشرفوا مع رئيسهم المخلوع في السجن !!!!
طيب نفرض ان المجلس صدق كده وغلط وساب الحكم . " مثلا مثلا يعني " , مين في البلد يقدر يوعدهم انهم مش هيتحاسبوا علي اللي حصل أو يمنع حد انه يرفع قضايا عليهم ؟؟؟
مفيش صفقات مشبوهة هتتنفذ لأن الشعب صاحي وواخد باله من كل حاجة ...
مفيش حد ليه حق ممكن يسيبه فما بالكم بدم الشهداء الغالي ...
مفيش خروج آمن ولا حد فوق الحساب علي جرايمه ...
مفيش ميزانيات سرية لمصانع الجبنة والمزارع ...
لأن في النهاية , لا يصح الا الصحيح ...
والايام بيننا . MK

مرحلة صعبة ,,, بس أكيد هتعدي !!!!

مهما كانت درجة صعوبة المرحلة اللي بنعيشها الأيام دي لازم نبقي مؤمنين انها فترة وهتعدي سواء طالت أو اتأخرت أو اتسرعت , المهم انها لازم تعدي ونخلص علشان نبدأ نقول احنا عملنا ثورة ونجحت والحمد لله , وانا متأكد ان ده هيحصل قريب لأننا بدأنا نتعلم من أخطائنا ونتجنب اننا نقع فيها مرة تانية . ودي حاجة مبشرة بكل خير لأنها صح 100% ....
اللي يتعلم من أخطاؤه هو أذكي الناس لأن مفيش حد مبيغلطش بس الذكاء اننا نستفيد من الغلط ونحوله لصالحنا بأننا نتعلم منه وناخد منه خبره تنفعنا في المواقف المشابهه ....
والحمد لله احنا اثبتنا اننا أذكياء وان فترة التخبط اللي فاتت كانت بفعل فاعل واحنا عارفينه وفاهمينه وهنعرف نتعامل معاه ....
مش زي الطرف التالت اللي مدوخهم وراه وعامل فيها الشبح !!!!!
اكتر حاجة ممكن تطمن الثوار انهم يبقوا ايد واحده ضد أي حد بيحاول يلتف أو يستفيد أو يتآمر أو يفكر يعمل أي حاجة ضد الثورة , مهما كان الطرف ده مين أو موقعه ايه أو فين ؟؟....
لازم نفرز وننقي وناخد بالنا من الناس كلها بدون تخوين ولكن من باب الحرص لأن المنافقين والمنتفعين الجدد هما بس اللي استفادوا من ركوب موجة الثورة أكتر من الثوار نفسهم !!!
مش عيب نقول اننا انضحك علينا وبمزاجنا كمان , لكن العيب اننا نعمل مش واخدين بالنا أو نكابر ونعاند بعض لمجرد عدم تقبل الاعتراف بالغلط " مع انه الاعتراف بالحق فضيلة " ....
أي واحد فينا غلط لازم يبقي عارف غلطته وأسبابها ونتايجها عليه وعلي غيره ويمكن علي بلده , ويفكر ممكن يصلح ده ازاي ويتجنب انه يحصل تاني بكل الطرق الممكنة وده المفروض يحصل تلقائي كده من غير ما نحس لأن الحاجة الصح مش محتاجة تردد في تنفيذها ....
انا متفائل من اللي شفته في الميدان الكام يوم اللي فاتوا حتي لو نتيجته اتأخرت بس هتكون نتيجة صح لأن الفكرة وتنفيذها وتجديدها كانوا صح وبامتياز ...
طول ما بنتعلم من اخطائنا يبقي مش هنغلط بإذن الله ....
ربنا يحفظ مصر وثورتها من شر كل عدو خسيس ....
الثورة مستمرة .MK

وباء " ضعف السمع " يجتاح البلاد !!!

للأسف ,, من ضمن قائمة الأمراض المتوطنة في مصر مرض " ضعف السمع المتعمد " ...
للأسف ,, احنا بقينا أحسن ناس تطنش وتكبر دماغها وتعمل مش واخدة بالها , ومفيش حد عاوز يبطل كلام ويسمع غيره وبالعكس كلنا مصممين نتكلم في نفس الوقت , علشان كده مفيش حد سامع التاني وكل واحد شايف نفسه صح والباقي غلط لمجرد ان رأيه مخالف لرأينا مع ان رأي أي حد مننا مجرد رأي ممكن يكون صح وممكن يكون غلط !!!!
وطبعا ,, نتيجة الحالة العامة دي بقي السمع مجرد أوبشن وحاجة مش ضرورية وممكن نعيش من غيره مادمنا بنعرف نتكلم , والغريب اننا عارفين ان مفيش حد بيسمع وبرضه مصممين نتكلم ومش عاوزين نفرط في المايك وكأنه هيهرب أو يختفي في ظروف غامضة !!!
ناس مصممة تحتفل بالثورة ومتجاهلة آلام غيرهم من أهالي الشهداء اللي دم ولادهم في طريقه انه يضيع زي كل حاجة قامت علشانها الثورة , والغريب ان الناس اللي بتحتفل هي الناس اللي كانت رافضة لفكرة الثورة من الأساس والأغرب ان في ناس مصدقاهم ...!!
يعني الناس دي عاوزة تحتفل وتفرح بالثورة أكتر من الثوار اللي عملوا الثورة معقول ؟؟؟؟
ونفس الناس اللي كانت بتنافق المخلوع بيعلنوا ولائهم التام للمجلس وكأن الموضوع مجرد عناد واستفزاز وخلاص لكل ما يرتبط بالثورة والثوار طيب ازاي انتم ضدهم وتحتفلوا بثورتهم. للأسف , الموضوع فعلا عناد في عناد وكل ما تحاول تكلم واحد منهم وتفهمه ان استمرار الوضع معناه ضياع الثورة واهدافها تلاقيه يقول ومن غير تفكير كلامك صح بس لازم نعمل كده من غير ما نخرب البلد ونولعها ولازم يكون في طريقة تانية غير المليونيات والاعتصامات !!!!
ولما تقوله ان المليونيات والاعتصامات هي اللي عملت كل حاجة السنة اللي فاتت من أول سجن العصابة لغاية تغيير الحكومة والحاجة الوحيدة الي اتعملت من غير مليونيات كانت التوقيت الصيفي وارقام الموبايلات وترددات القنوات وبس , وطبعا دي انجازات عظيمة!!!!
بس في انجازات تانية كتير واعظم لازم تتحقق وبسرعة ان شاء الله ...
الطريق الوحيد لاستكمال الثورة هو الثورة , ثم الثورة , ومفيش حل غير كده عندنا ...
احنا ياما سمعنا وشوفنا وسكتنا والنتيجة كانت خراب علي البلد وشبابها وبناتها ....
ياريت تفكروا تسمعوا انتم كمان وتبدأوا تسيبوا غيركم يتكلم وتحاولا تفهموه ....
يعني من الآخر كده مش هنفهم بعض الا لما نسمع بعض الأول !!!
بس مش عاوز حد يتكلم عن الثورة لأن الموضوع منتهي وخلصان ومفيش رجوع عنه ....
الثورة مستمرة .MK

سامحينا يا مصر علي التأخير ....

أول فكرة سيطرت علي دماغي هي احنا ليه اتأخرنا كل السنين دي ؟؟؟؟ !!!!
النهارد افتكرت الشعب ده عمل ايه زي اليومين دول , وقادر يعمل ايه بكره وبعده وكل يوم ...
النهارده يوم كل حاجة فيه كانت عاقلة ورزينة من غير تهليل ولا اندفاع ولا خوف وانكسار ....
كان يوم من أيام الثورة الأولي وكل حاجة فيه بتعبر عن شباب مصر وقد ايه بيحبوا بلدهم ....
كان يوم من غير مزايدة ولا تخوين ولا تجارة بدم الشهداء ولا فيه حسبة مصالح ومنتفعين ...
كان يوم لمصر , ولمصر وبس , مصر الي علشانها كلنا مستعدين نموت 100 مرة في اليوم ..
كل حاجة شفتها النهارده بتقول اننا لسه عندنا كتير ممكن نعمله علشان بلدنا ومستقبلها
ياريتنا عملنا الثورة من زمان كان زماننا دلوقتي بنفتكر الايام دي ونضحك علي اللي كنا فيه ونفتكر ازاي كانت البلد ممسوكة بالحديد والنار وبالرغم من كل ده الشعب كان عاوز يقول كلمته علشان كده أوامره اتنفذت غصب عن أعداؤه قبل احبابه وما اكتر الاتنين ...
يوم ما فكرنا نقول رأينا وكلمتنا العالم كله وقف يسمعنا ويحاول يتعرف علينا بجد ...
يوم ما قررنا ناخد حقنا الدنيا وقفت علي رجل لغاية لما خلصنا ورجعنا وهما لسه منبهرين ..
علشان كل ده انا بقول لبلدي أنا آآآآآآآآآآآآآسف اننا اتأخرنا في الثورة سنين طويلة .... آآآآآآآآآسف لأني مش عارف قيمة نفسي واخواتي وأهل بلدي لما يتفقوا يعملوا حاجة ...
بس مش عارف اكفر عن ذنبي ازاي غير اني قررت اني مش هسكت تاني خلااااااص ....
تفتكروا مصر هتسامحنا وتعذرنا وتفهمنا ؟؟؟؟
ربنا يسامحنا كلنا . MK

فاتت سنة واحنا لسه في الميدان !!!!

سنة كاملة عدت علي يوم ما نزلنا نطالب بحريتنا وكرامتنا والعدالة الاجتماعية ورغيف العيش اللي من غير ذل وحقوقنا في البلد دي , برغم الاستهتار والاستخفاف بينا وبثورتنا وقتها بس الدافع عندنا كان أقوي من كل اللي قللوا مننا ومن شأننا ومن امكانياتنا ....
بعد مرور سنة حاسس اننا انضحك علينا والمستفيد الوحيد من الثورة هم أعدائها ...
أنا مش متشائم بدليل اني نازل بكره وبعده وكل يوم لغاية ما نحقق أهداف الثورة . بس حاسس بمرارة لما ألاقي الناس اللي كانوا ومازالوا ضدنا وضد الثورة هما اللي نازلين يحتفلوا بيها وكأنهم صناع وقادة الثورة !!!! " مش قولتلكم التناحة نعمة مش نقمة "
مش عارف لما أقابل بكره أهالي الشهداء في الميدان هقول ايه عن حقهم ودم ولادهم ؟؟؟
مش عارف لما عيني تيجي في عين مصاب هقوله أنا عملت ايه علشان أجيب حقك ؟؟؟؟
مش عارف برضه لو ما نزلتش بكره ممكن أقول ايه لولادي عن الثورة والشهداء والمصابين ...
أبقي كداب ومغرور لو قولت أنا نازل بكره أجيب حق كل دول ,, بس برضه لو ما نزلتش يبقي الثورة خلصت خلاص والناس حقوقها ضاعت ومش بعيد البلد كلها تضيع لو مانزلناش كلنا ...
لازم نثبت اننا كنا قد الثورة يوم ما عملناها واننا مش هنزهق ولا نيأس ولا نرجع بيوتنا الا لما كل أهداف الثورة تتحقق ونحس ان كل واحد عارف يجيب حقه امتي وازاي وفين ؟؟؟
لازم نؤمن ان الثورة مش هتموت لانها فكرة " الأفكار لا تموت بموت أصحابها " ...
لازم كل البلد تعرف اننا ممكن نفضل عمرنا كله في الميدان لغاية ما تتحقق مطالبنا ....
ولازم احنا وغيرنا نعرف ان لو موتونا هينزل ملايين غيرنا يكملوا اللي بدأناه ....
وأخيرا ,,, ربنا يرزقنا بالشهادة أو النصر وساعتها ممكن نحتفل بجد ...
رحمة الله علي كل شهيد . MK

سقف الحريات وقع علي دماغنا ...

معقول نكون لسه بنتكلم عن التنحي أو الخلع أو التخلي ... الي حصل للمخلوع !!!!!
البلبلة اللي عملها كلام "فريد الديب" محامي المخلوع طبيعية لان دي مهنته ولازم يدافع عن موكله بأي دفوع حتي لو كانت كلام وخلاص لتعطيل سير المحكمة .. وده من حقه ...
انما اللي مش طبيعي ان الناس تهتم بالكلام الأهبل ده وتبدأ تفكر فيه وتسأل :
هو فعلا مبارك لسه الرئيس الشرعي للبلاد ؟؟؟ .
طيب بذمتكم ده سؤال ؟؟؟؟
طيب لو ده سؤال ممكن تكون اجابته ايييه ؟؟؟؟؟
أرجوكم بلاش نسيب حد يجرجرنا لحاجات تافهه تعطلنا وتشتتنا كفاية أوي اللي احنا فيه ..
كفاية المحاكمة الهزلية وعدم وجود أي ثقة فيها. ودي المصيبة الأكبر من كلام "فريد الديب".
كفاية ان البرلمان هيبدأ بكره أول جلسة ولسه مفيش اتفاق علي تشكيل أي لجنه ...
كفاية ان الاوضاع بقت زي الزفت في كل مجالات حياتنا ... أرجوكم العملية مش ناقصة ...
كفاية ان الشك والتخوين بقوا مسيطرين علي تفكيرنا وتصرفاتنا بسبب أو من غير سبب ...
كفاية ان المظلومين عددهم بيزيد كل يوم , وسقف الحريات اتطربق ووقع علي دماغنا ...
كفاية ان الثورة عدي عليها سنة كاملة ولسه بنحلم ونعمل مليونيات علشان نقول لأ ...
لو كل ده مش كفاية علي البلد وعندنا وقت فراغ بلاش نفكر في الكلام اللي مش هيقدم ولا يأخر وياريت نفكر في حاجة تفيد البلد وتجمع أهلها مش تفرقهم وتخليهم مجتمع مفكك.
طبعا في ناس من المنتفعين والمنافقين هتقف عند الكلام ده كتير وهتحاول توقفنا جنبها بس احنا لازم نكون أذكي منهم ونفوت عليهم الفرصة لأن اتعطلنا كتير أوي . كفاية ...
خلاص مبارك راح وراحت أيامه من غير رجعه ان شاء الله ...
لازم نفكر ازاي نقضي علي أعوانه وأتباعه اللي بيخربوا البلد وعاوزين يولعوها نار ...
هما دول أعدائنا اللي لازم نصحي ليهم ونفوق لهم لأنهم أقوي من مبارك نفسه ...
مبارك حلقة ضعيفة في سلسلة طويلة من الفاسدين ... وللأسف كان أضعف حلقاتها ...
كل سنة وانتم طيبين مع اني مش هحتفل بالثورة إلا لما يترفع الظلم عن الضباط اللي ساندوا الثورة وبيدفعوا التمن غالي ... ربنا معاهم هما وكل مظلوم في البلد ...
ساعتها هتبقي الثورة نجحت في رفع الظلم عن المظلومين وتبقي دي بداية تحقيق الأهداف اللي استشهد واتصاب واتسجن علشانها أرجل وأطهر شباب البلد ...
أهداف ثورة 25 يناير ,, فاكرينها ؟؟؟
عيش , حرية , عدالة اجتماعية ,,,,
عاشت مصر حرة ...MK

احنا عملاء ومأجورين , انتم تبقوا مين ؟؟؟

الشعب كله عملاء ومأجورين ...!!!
فاتت سنة كاملة علي الثورة وللأسف مفيش جديد , نفس أسلوب التخوين والاتهام بالعمالة لجهات مجهولة وأي حد يقول رأيه خارج القطيع يبقي عميل ومأجور . ليه ؟؟؟؟
أي رأي ينتقد أداء الحكومة والمجلس يقولوا عليه محرض وله أغراض سيئة تجاه البلد ...
طيب البلد كلها مخنوقة وتعبانة وحالتها صعبة بسبب مين ؟؟؟ أكيد سياساتهم الفاشلة ..
وبدل الاعتراف بفشل السياسات دي لقوا الحل السحري في اتهام الثوار بكل البلاوي اللي هما السبب فيها سواء عن قصد أو بسبب الفشل وتعمد القضاء علي الثورة ...
طيب أنا هصدقهم وأعمل مش واخد بالي وهفترض حسن النية في تصرفات كتير واضحة ومش محتاجة أي تبرير . وبعدين هتعملوا في البلد أيييييييه تاني ؟؟؟
ياتري هتكملوا في السياسات الفاشلة دي ولا عندكم جديد ؟ في جديد ولا لأ ؟؟ من حقنا نعرف انتوا واخدين البلد ورايحين فين ؟؟؟ . علي فين يا رجالة ؟؟؟؟ ...
طيب فهمونا وعرفونا وساعتها ممكن نسكت ونسيب الأمور ليكم لو عجبنا الكلام ..
انما موضوع مالكوش دعوة والشرعية معانا والكلام ده بيزود الطين بلة ...
أرجوكم فوقوا وواجهوا نفسكم بالحقيقة اللي كل الشعب عارفها ما عدا انتم ...
انتم السبب في كل البلاوي دي بسبب فشلكم المتعمد في ادارة البلد , مش احنا ...
انتم اللي عاوزين ترجعوا بالبلد عكس الزمن وترجعونا لأيام انتهت وخلصت خلااااااااص ...
انتم اللي هتخسروا في النهاية لأن مافيش حد هينتصر علي شعب كامل ضده ...
انتم اللي هتتحاسبوا علي جرايمكم مهما طالت أو قصرت المدة برضه هتخلص ...
احنا عملاء للبلد ومأجورين لمصلحتها ...
احنا خدامين تراب البلد ...
انتم بقي مين ؟؟؟ ...MK

امتي سيادتك هتشارك في تعمير مصر ؟؟؟

أنا زهقت من كتر الكدب والكدابين , بس برضه مش هضرب راسي في الحيط لأن الحيط مالوش أي ذنب وكمان راسي هي اللي باقية في الأيام اللي بنعيشها اليومين دول ..
سبب الزهق هو اصرار ناس معينة علي تشويه أي حاجة حلوة بتحصل وتجميل وتذويق أي حاجة وحشة وكأن الكدب والتضليل هما الأساس والغرض من الكتابة عند الناس دي ...
في أزمة وقود طاحنة ووزير البترول بيأكد ان الموجود في السوق أكتر من المطلوب !!!!!
السيد المشير بعد ما ثوار ليبيا قالوا " يسقط يسقط حكم العسكر " طلع يقول هنشارك في تعمير ليبيا !!! جميل وده أقل حقوقهم علينا لأننا اخوات وأهل قبل ما نكون جيران ..
بس امتي سيادتك هتشارك في تعمير مصر أو علي الأقل بطل تخربها وتفرقها وتكتم صوتها وتسحل شبابها وتسجن أحرارها وتيتم أطفالها وتقتل ثورتها لمصلحة المخلوع وأعوانه ...
وطبعا اعلام الحكومة بدأ يتكلم عن الدور العظيم وحكمة الرئيس " عفوا حكمة المشير " ...
كدب , كدب , كدب , وكأن مفيش حد هيعرف " في يوم من الأيام " ان كل ده كدب !!!!
احنا محتاجين ليبيا هي اللي تساعدنا وتقولنا ازاي نخلص من مؤامرة العسكر وأعوانهم علي الثورة والثوار لأننا بنرجع لورا وهما بيطلعوا قدام " من غير حسد والله العظيم " ...
وبكره نقعد نقول احنا فين وتونس وليبيا فين؟؟ واحتمال سوريا كمان " ربنا ينصرهم " ؟؟؟؟
طول ما في ناس من نوعية توفيق عكاشة والشيخة ماجدة وغيرهم من خريجي العباسية وطول ما في ناس بتسمعهم وتصدقهم وناس تانية بتنزل معاهم يبقي محدش يسأل عن نتيجة الثورة لأن الكدب مغطي كل حاجة ومفيش حد هيوصل للحقيقة في أي حاجة , من أول المحاكمات الهزلية الكرتونية لقتلة الثوار لغاية أزمة البنزين والسولار وأنبوبة البوتاجاز ...
كله بيكدب علي كله , وللأسف الكدب بقي اللغة الرسمية للحوار السياسي علي كل المستويات من أول المجلس والحكومة والإعلام والسياسيين والعباسيين لغاية أصغر واحد في البلد بيكدب علي نفسه ويقول ان كله تمام أو يحمل الثورة أسباب الفشل بالكدب !!!!
فيها ايه لو كل واحد قال رأيه بصراحه ؟؟؟ والأهم أنه يكون من غير خوف أو حسابات مصالح ,
مش هنخسر بالعكس هنكسب احترامنا لنفسنا علي الأقل , ودي حاجة مهمة وكبيرة ...
جربوا الصدق هتلاقوه أحسن بكتير , وهتلاقوا نفسكم مرتاحين نفسيا وضميركم مرتاح ...
خافوا علي البلد بجد وكفاية كدب .MK

حلم المتعوس اتقلب كابوس !!!

للأسف الحلم اللي عشناه سنة كاملة بطولها وعرضها وكل بلاويها ومصايبها بقي بعيييييييد وكأنه سراب . وبالرغم من اننا كنا قريبين من تنفيذه في وقت من الأوقات بس للأسف معندناش موهبة استغلال الفرص والمواقف . والموهبة دي مش شرط في الشباب دي شرط في السياسيين وهما بكل صراحة عرفوا يلعبوا عليها صح وركبوا الموجه وباعوا البلد والمباديء والثورة والثوار علشان شوية كراسي في برلمان مجهول السلطات والبابا غنوج.
أما ياحول الله الغلابة اللي اسمهم ثوار لقوا نفسهم لوحدهم بعد ما كل المنافقين والمنتفعين الجدد راحوا يحصدوا زرعة الثوار " حسبي الله ونعم الوكيل " .
بس لازم نفتكر ان دي غلطتنا من الأول ولازم نواجه نفسنا ونفكر ازاي نصلح الغلطة دي لأن البلد كلها بتدفع تمنها مش احنا وبس . وربنا عارف نية كل واحد بس النية مش كفاية .!!!
لما كنا عاوزين البلد تبقي أحسن بلد في الدنيا ماكناش عارفين ان أول ناس هتحاربنا هي الشعب المظلوم المقهور اللي ادمن الذل والهوان من كتر ما عاش فيهم ودي مصيبة تانية ..
والنظام زي ما هو مفيش أي تغيير غير في الأسماء والمناصب ولكن الطريقة واحدة ....
يمكن البجاحة زادت والظلم زاد وبقي عيني عينك واللي مش عاجبه يخبط راسه في الحيط ولما اتجننا وطلبنا محاسبة المسؤلين عن دم الشهداء حاسبونا احنا علشان ما نفكرش نعمل كده تاني وكأن اللي ماتوا هم المسؤلين عن استشهادهم وكأنه نزولهم انتحار !!!!
علشان الناس تقول أحسن هما اللي يستاهلوا اللي حصلهم والله يرحم أيامك يا مخلوع , وده بدأ يحصل فعلا مش مبالغة ,, كرهوا الناس في الثورة والثوار وفهموهم انهم سبب كل مشاكل البلد الأمنية والاقتصادية والسياسية وأي حاجة بتحصل بقصد أو من غير !!!
كلنا عارفين الحل وعارفين ان الثورة بتتسرق عيني عينك ومش عارف مستنيين ايه ؟؟؟
عارفين مستنيين ايه ؟؟ مستنيين الدور ييجي علينا وندخل طابور المظلومين والمعتقلين.
الحلم بقي كابوس مش عارفين هنصحي منه امتي ؟؟؟
ودي آخرة السهر علي النت والفرجة علي التوك شوز !!!!
فعلا النوم بدري راحو بال .MK

سكان كوكب جمهورية مصر العربية ..!!!!

كلمة " عدل " بقت نكتة , ونكتة بايخة كمان لأنها بتنرفزنا أكتر ما تضحكنا لأنها ..
بتنرفز من الملل وكتر الشكوي وكتر الشكاوي وكتر الشك . كمان ..
لأن القانون مش بيتطبق إلا علي عدد قليل أوي مننا والأغلبية متعرفش عنه حاجة ..
القانون واقف عاجز ومشلول قدام كل حاجه في البلد " طبعا ما عدا الثورة والثوار وكل قرايبهم ومعارفهم واصحابهم وجيرانهم ". وكأنه قانون من كوكب تاني غير كوكب مصر , مصر اللي انعزلت عن الكون كله وقفلت علي نفسها ورجعت بالزمن قروووون طويلة والفضل يرجع لينا كلنا مش الحكام والحكومات بس ( لأ ) احنا السبب ..
مصممين نعيش علي مزاج غيرنا , مصممين نعيش بتفكير غيرنا , مصممين نغيب رأينا ونسفه بعضنا , مفيش حد بيقبل الحساب وعاوز كل البلد تتحاسب علي أخطائها ما عدا سعادة جلالة سيادته !!! شعب غريب وتركيبة معقدة من البني آدمين ..
وف وسط الناس والزحمة . تاه الإحساس والرحمه . " بعد إذن مدحت صالح "..
بس مش هقول زيه " ضاق بيه مكاني كداب يا زماني " لأني لسه عندي أمل ..
في وسط كل ده الأنانية والتخوين والتخويف قابلت امبارح عند المحكمة العسكرية شباب لا يحركه إلا كلمة الحق ومن منظرهم تعرفوا انهم مش من النوع اللي بيقف يشتم أو يخرب أو يدمر بالعكس ناس رايحة تعترض وتقول رأيها بكل تحضر وهدوء وبيدعموا المظلومين أكتر من بعض أهاليهم نفسهم ومستعدين يتسجنوا هما كمان علشان كلمة الحق!!!!
أول ما تتكلم معاهم هتعرف مستوي ثقافتهم المرتفع وتعليمهم , وأخلاقهم بتقول انهم مش جايين يتسولوا شهرة أو بطولة وفي نفس الوقت مش عيال فرافير لأ في منتهي الجرأة والتحدي للظلم وأولهم البنات بس بمنتهي الهدوء والأدب برضه من غير افتعال لأي مشكلة طول اليوم مع انهم بينهم وبين العساكر حوالي مترين ومفيش أي فاصل أو مانع بينهم ..
الوقفة كلها هتافات بالحرية للضباط وشوية " بانرز " عليها صور الضباط المحبوسين ويفط بتطالب لهم بالحرية وفضلوا واقفين حتي بعد اعلان التأجيل وقعدوا بعد ما أهالي الضباط روحوا وبعدين بدأوا يتحركوا علي التجمع علشان يدعموا نوارة نجم في الأستجواب !!!!..
ولو قولتلهم ان في واحد مظلوم في مطروح حتلاقيهم أول ناس رايحه تدعمه , ليه ؟؟؟؟؟.
تهيألي انهم برضه سكان كوكب مصر زينا وعايشين ظروفنا وتفاصيل حياتنا بس لسه ما عرفوش طريق اليأس أو الخوف ورافضين طعم الذل وهما دول اللي عملوا الثورة ومصممين ينجحوها وهيحصل قريب جدا " ان شاء الله " غصب عن كل الأنانيين والخوافين والمنتفعين .
هي دي الثروة اللي عند مصر ومش عند غيرها " شبابها " ..
ربنا يحفظهم ويحفظها ..MK

في ريحة مش حلوة ليه ؟؟؟

أولا : وقبل أي شيء ,, بأدعي ربنا أنه يفك كرب زمايلي واخواتي الضباط الذين لا أعرف جريمة لهم سوي مساندة الثورة " وهو اتهام إثبت علي أكتر من 15 مليون مصري نزلوا وقالوا كده ". وطبعا لازم نشكر ونحترم كل الجهود المبذولة لمساعدتهم وربنا يقدرنا جميعا علي مساعدة أي مظلوم ولو بدعمه معنويا بالكلمة .
والبطولة مش انك تقول انا بطل ... لأ !!!!
البطولة انك تبقي عارف نتيجة عملك وعواقبه وبرضه تعمله لأنك حاسس انه واجبك ولازم تعمله .... وفي الآخر "" تعمله برضه "" ... والحق عمره ما هيضيع ان شاء الله ..
ثانيا : أحب أعتذر لحضراتكم عن كتابة كلمة " انتخابات نضيفة " في البوست بتاع امبارح لأني شفت حاجات كتير خلتني أغير رأيي بين يوم وليلة ..
مع أني انتقدتها برضه .. بس كلمة " نضيفة " بقت مش في مكانها خالص ...
آآآآآآآسف ..
أنا شفت كذا فيديو النهارده فيهم كلام خطير عن تزوير فاضح وللأسف أغلب الكلام قريب من الواقع . وبالذات بعد السكوت والصمت الرهيب اللي نتيجته الوحيدة هي الشك ...
بس اللي محيرني وقالقني ,, ليه التزوير ببجاحة وسذاجة للدرجة دي؟؟؟
الناس دي مش سذج ... في طرق كتير أحسن وأسهل من اللعب في أسماء الناس لأن كشفه سهل وكمان لأن في ناس كتير ما راحوش انتخبوا يعني اللعب في الاعداد أسهل والورق ورقنا ومفيش حد هيقدر يثبت حاجة , ولو حصل هيخلوا النيابة تعمل مش واخدة بالها زي ما بيقولوا , ولو لاقدر الله زنقت عليهم هيلاقوا رجالة تشيل الليلة , عادي ...
واللي مزود الطين بلة ,,, الهجوم علي كل أو معظم المراكز الحقوقية في التوقيت ده !!!!
يارب تطلع مناخيري مزكومة ومش واخدة بالها كويس لأنها صعبة قوي ..
لأن في حاجة قذرة " وده باين من ريحتها " بتحصل والصفقات شغالة علي ودنه ..
حرام نخسر البلد ونخسر نفسنا علشان كرسي في البرلمان أو حتي في القصر الجمهوري وده كلام كل أطراف اللعبة من اليمين لليسار, يبقي في ايه بيحصل في الضلمة ؟؟؟؟
يارب أطلع غلطان , ومفيش سر هيستخبي في البلد أكتر من أسبوع أو اتنين . يعني هانت كلها كام يوم وهنقعد نقول " وكل شيء انكشفن وبان " وساعتها بقي ؟؟؟ !!! ...
يارب ألطف بمصر . MK

سرقوا الصندوق يا معلم ,, وكمان مفتاحه معاهم ..

لازم أعترف قبل أي حاجة بأن الانتخابات البرلمانية كانت أول وأنضف انتخابات في تاريخنا بس برضه كان فيها أخطاء كتير قاتلة يارب ما نقعش فيها تاني بعد كده مثلا:
زي كل حاجة في البلد ما بتتسرق وتختفي في ظروف غامضة , الثورة كمان اتسرقت .. وده كان واضح من غياب الثوار عن البرلمان والتفرغ للإعلام وهو خطأ كبيييييييير ..
الانتخابات أكبر تعبير عن واقعنا المفكك والمتناقض والمتخبط وكأن هي دي كل صفاتنا !!! الشارع لايعرف الفيس بوك والتويتر والتوك شوز .. علشان كده رأيه مختلف عن رأينا ..
الانتخابات مفيهاش تزوير ,, لأن مفيهاش منافسة .. وكمان مفيهاش نزاااااااااااهة ...
دواير كتير محكوم ببطلان اجراءات الانتخابات فيها , وبرضه النتيجة مش هتتغير بعد اعادتها ..
أخطاء في كل حاجة من أول الترشيح لغاية الفرز رغم انها تعتبر الأفضل في تاريخنا كله !!!!
مش هنكر ان احنا لسه بنتعلم ألف بأء ديموقراطية بس كان ممكن يبقي في أحسن من كده لو مشينا صح من الأول وبطلنا نلف في دواير مفرغة ونضيع وقتنا ع الفاضي ..
الضبابية مسيطرة علي كل حاجة ,, حد عارف البرلمان هيستمر لأمتي ؟ حد عارف مين هيشكل الحكومة ولا مفيش تغيير ؟؟ حد عارف ايه اللي هيحصل ؟؟؟ حد عارف انتخابات مجلس الشوري هتكون امتي ؟؟؟؟ طيب الدستور امتي ؟؟؟؟؟
المهم ,,, اللي حصل حصل وخلاص ومش هيتغير . بس ياتري احنا هنتعلم من أخطائنا ونعدل في أسلوب وطريقة التفكير والتغيير ؟؟؟ أتمني ذلك ...
أتمني نقدر نوصل لبعض ونرجع نقرب تاني . بدل ما احنا عايشين وكأننا في جزر منعزلة عن بعضها رغم ثورة الاتصالات والميديا في العالم "وبكامل اخيارنا"....!!! ليه ؟؟ مش عارف ..
ياااااااااارب نوصل للصح ونحقق أهدافنا ونمشي بلدنا علي أسس سليمة وعصرية وتبقي الانتخابات أول درجة في السلم بشرط معرفة مين اللي هيبقي معاه المفتاااااااااااح ...
الديمقراطية مش صندوق وورق !!!!
الديمقراطية ممارسة ..MK